Organisado di “Nos Feria” y representantenan di Imeldahof a yama su di dos rueda di prensa pa asina mustra kico tur nan tin cla pa diasabra 24 y diadomingo 25 augustus,2019.

A dirigi palabra organisado di “Nos Feria” cu a resalta cu nan ta sumamente satisfecho cu e cooperacion cu nan a haya pa asina por realisa dos dia di feria pa Aruba su muchanan. Mas ainda cu tur loke ser recauda e fin di siman señala lo tin ta bay directamente ne pot di Imeldahof pa asina por restaura ‘Cas Irene’ cu ta den un estado basta penoso pa esnan cu ta haci uzo di dje. Ta hopi aña pasa y por bisa cu infrastructura a bay atras masha hopi mes, asina mes cu Imeldahof a percura pa mantene esaki segun nan por. Pero awor aki e daño ta mucho mas grandi y nan no por acapara e fondo pa drecha esaki riba nan mes, p’esey a hinca den otro e recaudacion di fondo aki pa asina nan por pone ‘Cas Irene’ funcionabel. Fin di siman 24 y 25 augustus 2

Natalia Hernandez, Directora di Imeldahof a duna di conoce: “Nos ta cla pa ricibi tur bishitante ne feria den cura di Imeldahof cu ta celebrando 65 aña. A planifica dos (2) dia di evento destina completamente na famia na ‘Nos Feria’. Mi gratitud na Gabrielle Ras hunto cu Fundacion CEO58 y Fundacion Imeldahof cu e fin di siman aki ta un realidad. Sperando e comunidad di Aruba, mayornan y specialmente e chikitinnan bin diberti nan mes”. “Nos Feria” ta conta cune presentacion di diferente DJ local cu lo anima e dia completo ambos dia, lo tin diferente tipo di cuminda pa grandi y chikito, co’i bebe, weganan, artesania y e famoso ‘dunk tank’ unda diferente figuranan publico di nos comunidad lo reta tur hende pa wak ken ta bashanan den e tanki cu awa. Esaki ta un di e tantisimo cosnan dibertido cu tin, ademas ta ser suplica si en caso na cas no tin ‘co’i hunga cu bo no ta uza mas y ta den bon estado bo por trece esaki den un caha y haci bo donacion. Den e diferente weganan den e feria lo uza material ‘reciclable’ y cu por sigui ‘recicla’ esaki di forma positivo.

Tambe tin e ‘open house’ pa wak ‘Cas Irene’ pa asina bo tin un bista cu bo propio wowo con e situacion penoso di e cas y cu mester haci algo urgente pa cu e caso aki. Den e cura di Imeldahof lo tin un seccion “Farmers Market”, esaki ta un area di benta di entre otro artesania completamente realisa pa nos propio artistanan. Pa esnan cu ta desea di ta parti di e grandioso “Nos Feria” ainda, por tuma contacto cu Gabrielle Ras na 566 0108 pa mas informacion. A bolbe remarca y splica cu esunnan cu ta desea haci un contribucion directo / donacion di cualkier indule ainda por haci esaki. Pa esunnan cu ta desea haci un donacion den forma di placa como tambe paña cu ta den bon estado y cu por ser rebendi, articulonan (entre otro co’i hunga) pa mucha di tur edad tur ta mas cu bon bini (por tuma contacto na 566 0108 of E-mail: ratrimong@gmail.com).

Dirigentenan di Imeldahof y e organisado di “Nos Feria” ta gradici tur hende cu ya caba di un forma of otro a contribui y yuda pone riba pia e fin di siman di “Nos Feria”. Tambe nan a subraya cu e comunidad di Aruba nunca a defrauda e muchanan principalmente y ni “Fundacion Imeldahof”. “Nos Feria” lo percura pa ambos dia ta un memorabel, un evento pa henter e famia disfruta y comparti, cu alegria di por wak nos muchanan di Aruba diberti manera nunca.”