Directora di Imeldahof, sra. Natalia Hernandez a bisa cu como fundacion nan ta canando basta bon, pero logicamente manera otro fundacion, nan tin nan necesidad financiero.
Nan ta haya hopi ayudo ainda di e comunidad di Aruba, pero esaki ta wordo refleha mas tanto den e parti di donacion di cuminda y paña. Pero sra. Hernadez a indica cu loke tin di haber cu donacion di placa, si a baha hopi durante e ultimo añanan.
“Nos ta compronde cu dor di e situacion cu tin na Aruba y mundialmente”, el a bisa. P’esey considerando cu prijsnan di cierto productonan a subi, nan tin cu wak bon con nan ta maneha nan presupuesto. “Esaki ta un parti cu nos tin cu traha hopi ariba dje pa nos keda mantene nos mes na e budget y keda ofrece e guia di calidad cu nos kier brinda na nos muchanan”, segun sra. Hernandez.
Presupuesto limita
Actualmente 31 mucha cu ta kedando cerca Imeldahof y nan tin e parti cu nan lo por aloca 51 mucha. Nan sa cu tin mas muchanan cu tin e necesidad pa un ayudo. Pero esey ta depende di e instancianan concerni cu ta aloca e muchanan cerca nan. Imeldahof ta brinda acogida temporalmente pa mucha homber di 6 te cu 14 aña; y mucha muhe te cu 18 aña.
Tambe Imeldahof como otro fundacion cu ta traha riba e veld social, nan presupuesto a wordo corta. Nan ta sinti esaki drasticamente y p’esey directora di e fundacion aki a enfatisa cu esaki ta rekeri un maneho stricto riba nan budget.
Sinembargo a pesar di e presion di maneha un presupuesto basta limita, esaki no ta kita cu nan ta sigui brinda tur loke nan clientenan ta merece encuanto di nan guia y actividadnan di tur dia cu nan tin cu brinda na nan. Nan ta duna ya sea e guia individual na e mucha den periodo cortico pa asina e mucha por bay bek den nan seno familiar of nan ta bay na un famia di criansa.
Muchanan interna
E muchanan interna den Imeldahof ta debi na diferente circunstancia cu nan no por keda mas biba cerca nan famia. E circunstancia aki lo por ta abuso di mucha, problema di comportacion di e mucha, abuso d droga y alcohol dor di mayornan, negligencia of maltrato di muchanan.
“Mi tin cu bisa cu pa e muchanan nos ta haci lo maximo pasobra e muchanan ta yega na prome luga cerca nos, y na bienestar di nan nos ta traha”, el a bisa.
Un punto cu sra. Hernandez kier trece dilanti cu Imeldahof como internaat cu ta existi caba pa 61 aña nan tin cu bay bek den comunidad pa trece mas encuanto nan trabou cu nan ta brinda na bienestar di nos muchanan mas vulnerabel. Di e forma aki e ta kere cu e fundacion aki lo por haya mas atencion pa sigui haya ayudo di comunidad. Nan como fundacion ta depende di subsidio di gobierno, pero nan ta para cu e fundacion mes mester traha riba e tereno cu nan lo por logra hopi mas dor di bay na comunidad y trece ayudo cu nan mester.
