Den un conferencia di prensa tocante Stichting Kindertehuis Imeldahof, minister di Husticia y Asuntonan Social, Rocco Tjon a trece dilanti cierto aclaracion mirando cu e directiva bieu di e instancia aki a retira.

Minister Tjon a bisa cu debi na e declaracionnan di e directiva bieu a crea cierto speculacion riba rednan social y tambe na cierto medionan di comunicacion, cu segun por a compronde, a publica informacion falso cu no a sali for di ministerio, manera el a sigura.

Tjon a declara cu Imeldahof ta un fundacion completamente independiente cu ta carga un responsabilidad grandi pa pais Aruba, na unda nan ta haya fondonan pa aña di miyones di florin pa asina por eherce nan tarea. “Mirando cu nan ta e unico fundacion cu e responsabilidad aki y ta e unico cu pais Aruba ta confia tambe cu e tareanan aki, ta hopi importante pa percura cu aspectonan financiero di e fundacion, aspectonan cu ta toca e Good Corporate Governance ta bon regla”, el a señala.

El a afirma cu e ta garantisa comunidad cu e unico interes di parti di gobierno y su persona como mandatario encarga, ta pa garantisa seguridad fisico y emocional di tur e muchanan cu ta na Imeldahof y muy particularmente, mirando cu muchanan pa hopi biaha a pasa den un trauma, den un situacion familiar insigur y ta pa e motibo ey cu nan ta na Imeldahof.

“Como mandatario encarga nos tin un deber pa señala ora cosnan no ta bon pa actua segun regla y ley. Pero tambe ora nos ta wordo confronta cu cosnan cu no ta bon, nos mester asumi nos responsabilidad y percura pa bin cu un cambio”, minister Tjon a expresa.

Tin puntonan cu a bin dilanti den su ministerio cu ta toca e situacion financiero di e fundacion, tin un debe cu pais Aruba di mas di 4 miyon florin. Pero di otro banda, nan tambe a wordo confronta cu un rapport cu ta toca e seguridad di e muchanan cu ta ubica na e luga aki.

“Mi por bisa cu a base di e puntonan aki nos a hiba un combersacion cu e directiva saliente y splica nan cu e situacion no por sigui asina”, el a comenta.

Pa loke ta trata e conclusion di e rapport cu ta toca e seguridad di e muchanan, “mi por bisa cu e conclusion aki ta asina alarmante cu te hasta nos a hiba combersacionnan cu Ministerio Publico, den e caso aki cu Procurador General”.

Mirando tur e aspectonan aki, minister Tjon ta considera cu ta obvio e seriedad di e situacion, unda cu nan no a wak solamente e parti financiero, sino cu statuutnan di e fundacion aki ta data di aña 1976, unda cu den su opinion si ta papia di Good Corporate Governance ta importante pa statuutnan ta actualisa.

Di mesun manera, el a aclaria e parti di metemento politico, bisando cu manera a menciona caba, e fundacion ta independiente y a base di combersacion cu su ministerio a hiba cu e directiva pa trece mehoracion, el a splica nan cu e situacion no por continua asina. Na e momento ey e directiva a dicidi di entrega nan retiro.

“Nos como gobierno no por exigi esaki, sinembargo, nan a compronde e situacion y nan a entrega nan retiro”, minister Tjon a sigura.

Tambe den conferencia di prensa, el a mustra e carta cu gobierno a dirigi na e directiva bieu, den cual a solicita na e directiva aki pa no nombra un directiva nobo y laga esey den man di corte. Esaki pa motibo cu segun ley y segun statuut, corte ta e caminda indica cu lo por nombra un directiva nobo.

Den un siguiente carta, el a splica cu e directiva saliente a contesta gobierno y a nan a haci un peticion pa percura pa por tin un traspaso lihe, pa por atende cu tur e retonan, pa ministerio mes nombra un directiva.

“Nos a haci esaki, y nos a papia di un directiva temporario riba peticion di directiva saliente”, el a expresa.

Situacion di Warda di Polis na Wilhelminastraat

Ademas, den e mesun conferencia minister Tjon a papia di otro topico cu ta e warda di polis di Wilhelminastraat. El a afirma cu tambe a papia di esaki den otro medionan di comunicacion relaciona cu e situacion di schimmels, un punto cu tin atencion di su ministerio. El a bisa cu tambe nan ta comunica cu sindicato di polis ,unda el a sigura cu e ultimo dos reunion cu nan tabatin cu sindicato di polis a keda cancela pa e sindicato mes, y cu kisas esey por ta e motibo di con nan no ta na haltura di e ultimo update.

“Na maart tabatin un mantencion extenso cu a tuma luga na warda di polis di Wilhelminastraat despues cu SPA a trece esaki dilanti y mesora a tuma accion. Sinembargo, e ta un situacion cu mester di atencion continuo y pa e motibo ey tin un persona di nos ministerio cu ta e punto di contacto directamente pa cu cuerpo policial”, el a bisa.

Tambe el a conta cu e edificio aki no ta di pais Aruba sino di FCCA y pa e motibo ey su ministerio y KPA tin reunionnan continuo structura cu FCCA tambe.

“SPA ta na haltura cu FFCA ta bay percura pa instala un sistema di ventilacion completamente nobo na e warda di polis aki y esaki lo mester alivia e situacion manera cu el a haci’e tambe na otro departamentonan di otro instancianan gubernamental.”

Esey ta un solucion a corto plaso, manera minister Tjon a afirma, pa motibo cu den un periodo di tempo Cuerpo Policial lo mester muda pa un otro luga, cu ta e proyecto di Ex-Codemsa, despues cu entrega e proyecto di ley na Parlamento pa cuminsa cu e trabaonan aki, Tjon a finalisa bisando.