Trahado di emergencia a continua saca auto y otro persona di awa halto, despues cu tormenta Imelda a yega area di Houston, un tormenta cu a laga cuater homber morto y a desplasa centenares di persona for di nan hogar.
Imelda a bira un dolor di cabes pa hende biahando cu auto cu tabata coriendo riba plas di awa. Tambe mas di 900 vuelo di avion a ser cancela of atrasa. E awasero fuerte a caba diahuebs anochi, pero pronostico ta adverti cu lo sigui na nort di Texas, Arkansas, Oklahoma y Louisiana, unda por tin inundacion.
Un hende homber 19 aña a hoga y electrocuta ora cu tabata move su cabay na un luga sigur, segun palabra di e famia. Un otro hende homber di 40-50 aña di edad a hoga ora el a purba pasa cu un van den awa di 8 pia di profundidad di aeropuerto Intercontinental Bush na Houston. E di tres morto tabata un homber, cu su restonan a wordo haya nort di Houston, segun vocero di comisario di Harris County, Jason Spencer, a bisa. Indicacionnan preliminar ta cu e homber no identifica a hoga. Ademas, ayera polis na Beaumont a bisa cu a haya curpa di un homber di 47 aña den un Toyota Prius, descubri den un canal inunda despues cu e awa a baha.
“E problema ta cu nos no por haya 100cm di awa den un periodo di 72 ora y ta completamente prepara pa esey”, vocero Allison Getz, di Jefferson County a bisa AP.
Getz ta bisa cu miles di persona a biaha na e condado cu boto y un cabuya mara for di Louisiana y otro parti di Texas pa asisti cu esfuerso di rescate. Na Chambers County, ta calcula aproximadamente cu 800 cas y negoshi tin daño pa e nivel di awa. Ta bisa cu personal di emergencia a rescata 400 persona di nan cas.
