Ayera tardi, ciudadanonan a tuma nota cu un biaha mas dump na Parkietenbos tabata na candela. E biaha aki e candela tabata hopi grandi, loke a causa un impresion entre comunidad.
Segun informacion cu redaccion di Bon Dia Aruba a ricibi, minister di Naturalesa, Ursell Arends a presenta na e sitio. Bon Dia Aruba a tuma contacto cu Arends, kende a confirma cu el a presenta na e sitio cu su beleidsadviseur y un inspector di Bureau City Inspector. Arends no a duna mas detaye di e suceso.
Desde dia 1 di januari ultimo, dump na Parkietenbos ta cera pa publico. Sinembargo, e gas cu ta bao di e montaña di desperdicio ta bay keda pa hopi aña mas, representando un peligro pa candela. Tanten cu no tuma e stapnan pa sanea e dump, pone tubonan pa saca e methaangas, entre otro, e peliger ta keda cu e dump ta bay continua pega na candela.
Luna pasa, minister Arends a presenta e Blueprint pa maneho di desperdicio despues di ceramento oficial di dump. Durante un conferencia di prensa e tempo ey, Arends a sigura cu esaki ta bay ta un proceso pa remedia e area, den cual tin planea pa bira un solar panel farm, caminda segun indicacionnan por ubica mas cu 16.000 solar panel y esey lo produci coriente pa Aruba tambe. Arends a describi e dump na Parkietenbos como 70 aña di historia dera bao un sero cu por wordo mira for di cualkier punto di bista halto, unda un sin fin di producto y material kimico a pusha economia te caminda unda e ta awe. El a sigura cu a faya di no actua mas lihe pa con Aruba ta maneha e sushi, unda hopi hende a lucha, a papia, a bringa pa ta mas saludabel den nan cas y den e pais. “E fayo di Parkietenbos ta refleha riba pasado y pa refleha e esfuerso di un miho futuro, dia 31 di december ta e ultimo dia cu dump di Parkietenbos ta habri pa publico”, el a señala.
