Igualdad y oportunidad sin importa genero

Recientemente tabatin un simposio di metanan mundial pa desaroyo sostenibel. E meta ta pa bin cu maneho pa crea mas igualdad y oportunidad pa tur ciudadano na Aruba, no obstante nan sexo.

Jocelyne Croes ta Raadadviseur di gobierno, tambe asunto multilateral y chair pa e comision di meta sostenibel di Nacionnan Uni y igualdad di genero na Aruba. “Nos kier implementa un politica na Aruba, esey ta bin ta pasando. Nos por bisa cu ta un orguyo pa tin un prome minister femenino pa prome biaha den historia, cual ta algo remarcabel.”

Sinembargo, e ta remarca cu ta importante cu prome minister a dicidi cu kier un maneho pa con por crea mas igualdad y oportunidad pa tur ciudadano na Aruba sin importa nan sexo.

Croes ta bisa cu un parti importante cu ta nota den economia cu ta basa riba turismo, ta cu pa aña largo hende muhe ta carga turismo. Sinembargo, maske tin mas hende muhe cu ta haya trabou, pero no ta haya e mesun salario cu hende homber, y ‘esey ta e parti discriminatorio’.

E ta bisa si cu idea ta pa mira unda tin productividad, pa mira unda tin mas crecemento economico tambe. “Pa pone mas oportunidad pa hende muhe, mester wak cua ta nan problema, kico ta afecta nan productividad, manera violencia domestico. Ta hopi hende muhe ta victima di esaki”, e ta expresa

Tambe tin efecto den e parti di pobresa, cu ta afecta mas hende muhe. E ta duna ehempel den un hogar, unda un hende muhe tin cu carga cu tur problema. Situacion asina ta haci cu e hende muhe no por ta mas productivo y no por tin e mesun oportunidad cu un hende homber.

Sinembargo esey no kita cu e tambe tin derecho pa contribui na e crecemento economico y desaroyo di e pais. Croes ta bisa cu esey ta realidad, cu ainda por mira cu oportunidad y responsabilidad entre genero no ta mescos.

“Ta bon pa para keto y mira con tur ser humano ta progresa di un manera digno y wak con por implementa maneho y haci analisis di kico e problema lo por ta. Asina nos tur por crea un Aruba miho, na unda oportunidad pa contribui na nos pais por ta igual, esey ta esencial”, el a bisa.

A puntra Croes con Aruba ta para den igualdad di genero, en comparacion cu otro pais di mundo. E ta bisa cu e problema ta den diferente tereno, pa motibo cu pa locual ta participacion di hende muhe den mercado laboral ‘nos ta para basta bon’, hasta compara cu paisnan desaroya.

Pero locual ta trata e nivel di salario, den par sector ta igual, pero pa otro trabou, hende homber ta gana mas cu hende muhe cu ta haci e mesun trabou. “Pakico e mester ta asina?”

Un desafio ta hende muhe cu ta victima di abuso sexual y tambe trato di hende muhe. Tambe cual ta e rol di un hende muhe den area di cuido. Den esey, Croes ta bisa cu Aruba por haci miho den comparacion cu pais Europeo of otro pais. Den tur esey, e ta bisa cu tur tin cu carga e responsabilidad hunto y crea oportunidad necesario.

Sinembargo, dicon hende muhe y hende homber tin e mesun titulo, pero pa motibo cu ta hende muhe, ta gana menos. Con esey ta evalua actualmente? Tambe cu hende muhe tin menos promocion cu hende homber. E ta contesta cu esey ta e problema di henter mundo.

E ta splica cu por mira mundialmente cu futbolista homber ta gana mas placa cu muhe. Tambe ta wak den e mundo di cinema, como Hollywood. Pa e motibo aki tin movementonan y activistanan, pasobra nan tur ta actor, pero muhenan ta gana menos cu hende homber.

“E ta algo automatico, e ta manera un tradicion cu a bin ta estableciendo di historia, anto e ta sigui asina. No tin rason pa e sigui. Tampoco nos no ta para keto y pensa riba problema y e manera pa cambia esaki”, e ta bisa.

Croes ta expresa cu si esaki no cambia den bo ‘mesun seno di cas’, e ora no lo wak un cambio. Si un persona ta haci un trabou, no mester wak e a base di genero, sino igualdad di e mesun trabou.

Pa es motibo a bin cu simposio pa un parti por saca analisis pa bin cu maneho riba genero. Esey ta bay encera con e situacion di pais Aruba ta, pa asina e proceso pa e maneho ta mas facil y sigui pusha pa igualdad.