Den edicion di 13 di maart 2024, Bon Dia Aruba a publica un articulo den cual a trece pa dilanti e carta cu organisacionnan di iglesia y pastoornan di islanan CAS a manda pa Corte di Casacion na Hulanda, tocante e tema di legalisacion di matrimonio pa parehanan di mesun sexo. Reportero di Bon Dia Aruba a tuma contacto cu e organisacion aki na Aruba, y logra sinta pa un entrevista despues di e publicacion pa asina por elabora mas ariba e topico aki.

Durante e entrevista pastoor Norman Browne y pastor Frank Daal a trece pa dilanti nan argumentonan contra di e legalisacion di matrimonio pa parehanan di mesun sexo, kico en realidad ta nan punto di bista ariba e tema aki y con nan ta para pa defende e mandato di Dios.

E carta, data 11 di maart 2024, ta un carta abierta cu e presidente di Iglesianan Cristian di Aruba (ICA), Sr. Gilberto Martes; presidente di Asociacion Pastoornan di Corsou (APK), Said Flores; y presidente di Sint Martin United Ministerial Foundation, Orlando Wilson, a manda pa Sorte di Casacion na Hulanda.

Pastor Norman Browne a splica cu door cu e organisacionnan no ta un partido den e caso, ta pais Aruba y pais Corsou ta partido den e caso, nan no ta spera un reaccion ariba e carta aki for di corte, pero el remarca cu si nan ta kere cu tanto Corte como pueblo Hulandes lo tuma nota di e carta.

El a sigui splica cu normalmente Corte ta tene cuenta cu e argumentonan cu ta ser treci pa dilanti door di ambos banda y argumentonan cu e organisacionnan religioso a trece pa dilanti den e carta, el a indica, mayoria ta cuadra cu locual e abogado defensor di Aruba y e abogado defensor di Corsou a trece pa dilanti.

“Nan no ta obliga di tene cuenta cune, pero nos ta kere si cu nos a subraya e puntonan cu nos a abogadonan a trece pa dilanti durante e caso,” el a enfatisa.

Ainda no tin un veredicto ariba e caso aki y Corte tin te cu dia 31 di mei pa bin cu un decision final. Pastoor Browne a indica cu e abogado general cu a duna conseho na e corte tabatin te 19 di januari pa trece su recomendacionnan y e abogado aki a duna su recomendacionnan un luna delanta, dia 22 di december 2023, y su conseho tabata pa Aruba y Corsou legalisa matrimonio pa parehanan di mesun sexo.

Un di e argumentonan di e comunidad LGBTQI+ ta bisa cu e meta pa legalisacion di matrimonio pa parehanan di mesun sexo ta pa tin igualdad, pa tin e mesun derechonan y cu esaki no tin nada di haber cu religion. Pastoor Frank Daal a splica cu ora ta papia di union civil of matrimonio y si e comunidad aki ta solamente busca e derechonan, nan por djis bay un notaria y drecha esey, pero e comunidad LGBTQI+ tambe ta bisa cu nan kier wordo considera igual cu un matrimonio entre un hende homber y un hende muhe.

El a remarca cu como iglesianan, nan ta considera nan mes como e defensornan di loke ta moralidad y nan ta esnan encarga di parti di Dios pa sali afo y “spierta”e hende en general tocante e boluntad di Dios.

“Di eynan nos ta sali bini. No pa crea odio ni nada di esey, pero solamente mustra riba palabra di Dios. Nos kier respeta derecho di tur hende, mientras cu e no ta bay konkel den loke ta e moralnan di Dios y esey ta caminda cu nos ta bin aden,” el a enfatisa.

Pastor Daal a subraya, un punto cu tambe ta bin dilanti den e carta abierta na Corte di Casacion na Hulanda, cu parehanan di mesun sexo kier wordo trata igual, pero, segun el a indica, no tin igualdad den e caso aki y cu hasta Corte Europeo a bisa esey.

El a splica cu no tin igualdad den e caso aki pasobra matrimonio pa parehanan di mesun sexo no ta un derecho humano. El a indica cu e no ta un derecho humano pasobra ora e pareha bin hunto nan no por funciona manera cu un pareha heterosexual por funciona.

“Dios a diseña un matrimonio entre un homber y un muhe cu cierto habilidadnan pa nan por cumpli cu Dios su diseño. Dios kier multiplica su mes door di un matrimonio pa sigui procrea descendencia devoto, e idea ta pa nan procrea, pa nan yena e tera, pa domina, goberna y cuida e creacion di Dios y esey ta bay bao di cierto reglanan,” el a enfatisa.

E pastoor a señala cu na e momentonan aki nan ta bezig cu e asunto di legalisacion di matrimonio pa parehanan di mesun sexo, pero ora cu bin cu otro tema, manera eutanasia, abortus, abuso di tur tipo, falta di educacion, kita e derechonan di mayornan pa lanta nan yiunan manera debe ser, entre otro, como iglesia di Dios nan ta sinti nan mes yama di parti di Dios pa sali afo y bisa algo.

Den e argumentonan ta bin pa dilanti cu e ta discriminacion si nenga e legalisacion di matrimonio pa parehanan di mesun sexo. Pastoor Daal a agrega cu no por papia di discriminacion pasobra, segun el a indica, nan no ta discriminando pasobra si e palabra di Dios ta bisa cu esey no por, e ora no tin cuestion di discriminacion. “For di eynan nos ta sali, y cu tur respet,” el a bisa.

El a menciona cu como iglesia ta importante tambe pa pueblo mira nan un tiki como un tata educando su yiunan. El a duna como ehemplo cu ora un tata ta wak su yiu ta cana den cierto tendencianan, sea ta links of rechts, luganan peligroso etc. e tata ta keda orienta for di e luga di amor, educa su yiu y no bandon’e. Y for di nan punto di bista, como iglesia, nan tambe ta keda haci esey.

“Di nos parti esaki nunca ta bay stop, semper nos ta bay keda. Si e ley aki bay of bin, nos ta bay keda bin afo y spierta pueblo riba husticia y bisa nan hala for di e caminda di pica. Si bo kier duna Dios loke ta di Dios, esey ta e parti cu e ta pidi nos haci. E ta un mandato. Ta hopi lamentable di mira un sociedad cu a wordo lanta y beneficia door di Dios, aworaki ta bira lomba pa Dios. E poco bon cu t’ey ainda, ta Dios ta bendiciona nos cune,” el a enfatisa.