Iglesianan Cristian Aruba ta continua cu accion di firma contra sentencia di HOF pa matrimonio di mesun sexo

6 di december ultimo Corte Supremo na Corsou (HOF) a duna un sentencia unda ta indica cu a dicidi cu matrimonio di personanan di mesun sexo ta posibel na Aruba y Corsou, pero esaki no a cay den bon tera pa algun grupo di comunidad cu no ta di acuerdo cu e decision ey.

Pa e motibo aki, Iglesianan Cristian Aruba a bin vociferando nan voz for di dianan pasa y den esaki ta inclui un accion di firma contra e sentencia di HOF pa asina ey por bay Corte di Casacion unda nan ta señala cu “Famia y Educacion ta e fundeshi pa un comunidad duradero” “Ban proteha matrimonio, famia y principalmente muchanan y e siguiente generacionnan.”

Nan a informa tambe cu den cualkier iglesia afilia na Iglesianan Cristian Aruba personanan por acerca pa firma of por subi riba nan Facebook page y ta haya e link pa firma di forma digital.

Mientras tanto, Corsou a sigura cu nan si ta bay apela e decision ey sigurando cu nan no ta convenci cu e veredicto di Corte di Apelacion y nan a dicidi di bay casacion.

Aruba te ainda no a dicidi riba e sentencia aki unda cu den edicion di Bon Dia Aruba di 21 di december ultimo prome minister Evelyn Wever-Croes a sigura cu “nos ta wardando tur conseho drenta pa nos tuma un decision,” el a bisa.

El a splica cu gobierno a anuncia su posicion algun dia despues di e veredicto y a bisa cu aworaki cu e ta un veredicto di corte, nan mester warda ariba e consehonan. Den un comunicado di prensa nan a indica cu nan a pidi conseho aki na Aruba y un conseho di Casacion na Hulanda. Wever-Croes a remarca cu prome cu nan tuma decision di establece un casacion of no, mester di un conseho di casacion.

“Nos ta bezig ta recolecta e consehonan y esey por dura algun tempo. Un conseho di casatie bo no ta haya 1, 2, 3. Nos ta wardando aworaki ariba kico e timeline lo ta pa e conseho aki y despues nos lo consulta cu Parlamento na Aruba y despues nos lo por bisa ki decision nos lo tuma. Casatie of no Casatie”, el a enfatisa.

El a subraya cu na e momentonan aki nan ta wardando pa e consehonan. Con largo e lo dura no ta sigur. El a splica cu tin tres luna pa drenta den Casacion. “Mi ta spera cu e conseho di casatie por drenta dentro di un luna y na momento cu nos tin tur e consehonan e ora ey nos por tuma un bon decision. Ami no ta tuma niun decision sin pidi conseho”, Prome Minister a bisa.

E veredicto aki a ocasiona un ola di reaccionnan tanto positivo como negativo den comunidad. Entre otro e Comision Pastornan Christian a demostra nan malcontento y fraccionnan MAS y Acccion21 a entrega ley na Parlamento di Aruba pa trata matrimonio pa pareha di mesun sexo.

Riba rednan social ta hopi comentario ta bin dilanti riba e topico aki, algun di nan hasta a skirbi comentarionan manera “dicon cristiannan no ta haci mas pa muchanan, hende cu ta malo of hende grandi cu nan so den nan cas?.”

Entre otro comentarionan cu a wordo publica tin lo siguiente:

“Lo ta great pa wak e MESUN entusiasmo pa un campaña contra abuso di mucha/pedofiel cu por cierto ta pasa masha hopi den Iglesia rond mundo y sin lubida aki na Aruba mes. Cuminsa un campaña riba esaki crea awareness riba caso cu REAL ta conta of manera boso lema ta pa proteha mucha y famia! #DoubleStandards #hypocrites.”

“Union entre iglesia ta positivo, pero e ta tristo pa mira cu e causa aki ta haya un enfoke asina principal, meanwhile otro topico manera pobresa, educacion di mayor, desaroyo di mucha/hoben, cuido di hende grandi sigur no ta haya e mesun atencion. Mi ta lesa cu ta bisa “famia prome”, pero e discriminacion y exclusion di entre otro LGBTQI community ta causa hopi tristesa den nos mesun famianan. Ta desea un pueblo prospero, pero tur hende ta forma e pueblo. Con por tin prosperidad si cada bes hende ta keda atras? Tur hende tin e derecho di ta feliz. Mi ta un persona spiritual y mi por bai di acuerdo cu hopi balornan cristian, pero ariba e punto aki iglesia ta perde mi. #derechohumano #derechoigual.”

“Ki dia boso ta bin cu firma pa abuso sexual di mucha ?????.”

“Inocentemente e mucha ey ta hay’e pega den un entorno cu pa su concepto ta normal segun e minoria paso esey ta bay ta e siguiente ley mescos cu Hulanda y Merca. Nos mester siña cu nos tambe mester tin nos mes un identidad norma y balornan. Na momento cu un pueblo perde su custumber normanan y balornan e ta condena di biba den lujuria y libertinahe unda tur hende kier bin cu cada cos cu pasa den nan cabes pa busca e derecho cu segun nan, ta derecho cu nan mester lucha pa contaminando esnan di otro.”

Esey ta parti di opinion di personanan riba rednan social, pro of contra matrimonio di mesun sexo unda manera a wordo menciona caba, Aruba te ainda no a dicidi, ta keda sigui warda posiblemente te otro aña kico ta bay ta e decision pa cu esaki.