(AP) —Lidernan di Iglesia Catolico Polaco ayera a defende e santidad di e fayecido Juan Pablo II y e proceso rapido di canonisacion den respuesta na un reportahe den television Polaco acusando cu el a tapa abusonan sexual di e clero durante su arsobispado na Polonia.
E figuranan di Iglesia Polaco tambe a bisa cu un comision di experto den varios ramo – abogado, dokter, psicologo y historiador – ta bay keda forma pronto pa investiga casonan di abuso di menor na man di e clero den pasado.
Un reportahe siman pasa riba TVN24, cual ta propiedad di compania Mericano, Warner Bros. Discovery, a nombra tres pastoor cu supuestamente Juan Pablo a move rond durante añanan 1970 despues cu a acusa nan di abusa menornan. E reportahe a cita documentonan di seguridad secreto comunista, pero tambe tabata inclui entrevista cu sobrevivientenan di abuso.
Papiando despues di un reunion di dos dia cu henter e Episcopado, e lidernan a insisti cu – maske inusualmente rapido – e proceso cu a resulta den anuncia Juan Pablo, di nacemento Polaco, como santo a ser haci cu e mayor cuidado y honestidad y ta refleha e estimacion general cu el a disfruta como papa.
Juan Pablo ta venera na e pais predominantemente Catolico Romano pa su rol den yuda caba cu comunismo y caba cu e dominio di Moscu na Polonia y e region. E reportahe di TVN a genera un debate nacional cayente na un momento durante cual Iglesia Polaco ta enfrentando su record di abuso sexual na man di clero.
Arsobispo Grzegorz Rys a bisa cu “tur pagina” den archivo di e iglesia durante e proceso cu a cuminsa tiki despues di morto di Juan Pablo na 2005 y a conduci na su santificacion na 2014 a keda examina. Karol Wojtyla a sirbi como arsobispo di Krakow di 1964 te 1978, tempo cu el a bira Papa Juan Pablo II.
Rys a destaca cu documentonan di era comunista alegando abuso mester ser lesa cautelosamente, cu conocemento di e epoca.
