Diabierna atardi Gobierno di Aruba a anuncia oficialmente cu a tuma e decision, pa loke ta trata e tema di matrimonio di parehanan di mesun sexo, di bay casacion. E noticia aki a ricibi diferente reaccion for di ambos banda, persona- y gruponan cu ta pro, como for di esnan cu ta contra esaki. Relaciona na e noticia aki e grupo di Iglesia Cristian Aruba a reacciona riba decision aki.
Sr. Frank Daal di Good Samaritan Christian Center y representante di e grupo Iglesia Cristian Aruba a indica durante un conferencia di prensa cu nan trabou ta defende e fe Cristian cu ta wordo practica pa mas di 92% di e poblacion di Aruba. “E ta importante pa sa cu nos no ta politico, nos ta representa e iglesia di nos señor. Nos ta yama pa mantene e compas di moralidad den e sociedad. Nos ta yama pa ta e luz y e salo di e tera aki,” el a bisa.
Daal a remarca cu moralidad ta algo cu nan tin bon cuenta cune y pa esey nan ta sali, pa defende e moralidad di e isla. “Aruba no por bira un luga cu tur hende ta haci y deshaci manera nan ta haya ta bon, si no e cos aki ta bruha bira un pocho pocho.”
El a enfatisa cu nan ta celebra e decision di gobierno pa bay casacion y nan ta wak e como un victoria. Alabes el a recorda cu nan accion di firma tabata contra e decision di Hof pa forsa ehecucion di matrimonio di parehanan di mesun sexo, sin Aruba su aporte.
Daal ta agrega cu Hof no por sigui pasa su liña di autoridad y dicidi pa Aruba con cos tin cu bay. For di perspectiva di iglesianan Cristian, el a menciona, mester laga Aruba dicidi, specialmente ora ta trata asuntonan fundamental cu tin di haber cu moralidad.
“Hof no por djis bulldose nan deseo contra Aruba su deseo pa ta moral, si Aruba permiti esaki e ora mañan, na bispo di un diabierna santo Hof ta bira pasa ley di abortus, ley di eutanasia, un ley di leerpakket homo etc. riba nos y nos yiunan,” el a añadi.
Di nan parti, Daal ta indica, nan ta spera cu den casacion e error di Hof por wordo coregi debidamente.
El a ratifica cu como iglesia e decision di Gobierno di Aruba pa bay casacion ta un gran victoria y cu e bos tras di e mas di 16 mil persona cu a firma caba a wordo honra door di gobierno.
Daal a continua y a menciona cu tin tres partido chikito den parlamento, referiendo na Accion21, MAS y RAIZ, cu a uni y a entrega un proyecto di ley pa legalisa matrimonio entre parehanan di mesun sexo. El a indica cu esaki ta un ley paralelo cu esun cu Hof kier a impone. “Todo por todo e activistanan kier forsa e ley aki y mañan ta bin mas ariba Aruba.”
E representante di Iglesianan Cristian Aruba a señala tambe cu e precursor di e grupo aki tin intencion pa bin cu ley di abortus, ley di eutanasia etc. tambe na Aruba, cu ta cosnan cu Aruba no conoce, cu Aruba no ta aproba, cu como un pueblo moral Cristian nan no por permiti.
Na mesun momento el enfatisa cu e ta anima e pueblo di Aruba pa sigui firma. Pues e accion di firma no ta stop y te cua aworaki nan a pasa 16 mil firma caba, cual ta casi 25% di electorado. Recientemente nan a haya e noticia cu Iglesia Catolico tambe a uni na e accion di firma aki y nan ta spera cu nan lo haya mucho mas firma.
“Bo firma tin un balor hopi grandi, specialmente despues di e decision pa bay casacion. Cada firma ta un declaracion individual riba su mes cu Aruba ta moral, Aruba ta Cristian y Aruba ta contra di e cosnan cu no ta agrada Dios. Esey kiermen cu cada firma mester wordo respeta. Cada firma ta forma e bos di e pueblo. Mas firma, mas fuerte e bos di e pueblo,” Daal a accentua.
El a agrega cu e firmanan aki tambe ta un señal fuerte pa cada miembro den Parlamento di Aruba, esnan di awo y esnan pa futuro ya cu un dia Parlamento lo mester bay vota sea pro of contra e ley di matrimonio di mesun sexo y e 16 mil hende cu a firma te cu aworaki, ta bay tin bista riba esaki. “Esaki no ta un menasa, esaki ta nos derecho como votado,”el a indica.
“Un dia ta bay tin un siguiente eleccion tambe y nos lo bay monitoria esaki tambe di cerca. Antes no tabatin firma, awor si nos tin firma, awo si nos sa kico e pueblo eyfo ta pensa,” Daal a añadi.
Daal a referi tambe na e atakenan, y hasta menasa di morto, cu iglesia Cristian y su miembronan a ricibi despues di a dicidi di cuminsa cu nan accion di firma.
Pa loke ta geregistreerd partnerschap, Daal a bisa cu Aruba compara cu e otro islanan a aproba e ley aki, pues no por bisa cu Aruba ta discrimina ya cu Aruba a reconoce e derechonan di e grupo minoritario aki den un union civil.
El a sigui splica cu Corte Europeo pa derechonan humano ta exigi di e paisnan miembro pa nan ofrece sikiera un alternativa, manera union civil. Aruba a cumpli. Como Iglesia Cristian Aruba nan ta desea pa den casacion, e punto aki wordo treci dilanti pa sigura cu Aruba no wordo tilda di ta discrimina.
El a enfatisa tambe cu mester defini tambe bon cla, kisas hasta den un dialogo, e beneficionan entre matrimonio y union civil.
