Iglesia Catolico a destitui tres sacerdote di El Salvador, ora cu a haya nan culpabel di abuso sexual di menor, José Luis Escobar, arzobispo di San Salvador, a bisa.
“Nos a conclui cu e proceso penal eclesiastico contra tres sacerdote, cu tabata acusa di abuso sexual di menor. E tres sacerdotenan a ser haya culpabel den nan huicio, y nan a duna e pena di dimision di estado clerical”, Escobar a señala.
P. Jesús Delgado, un di e sacerdotenan acusa di abuso sexual.
E tres sacerdotenan cu a ser destitui pa e Vaticano ta: Juan Francisco Galvez, Antonio Molina y Jesus Delgado.
Arkidiocesis a kita Delgado di su funcion, mientras cu e tabata vicario di arkidiocesis pasobra el a ser acusa di viola un muhe, na momento cu e muhe tabatin entre 9 y 17 aña.
Na november di 2015 arzobispado a yega na conoce e scandal di abuso di menor. Delgado tabata un historiador di iglesia y biografo di Monseñor Oscar Arnulfo Romero, awo santo di El Salvador.
Galvez a ser suspendi na final di november como sacerdote na municipio Rosario de Mora, na San Salvador, como consecuencia di cinco caso di pedofilia cu a ser denuncia.
Di otra banda Molina a ser suspendi na februari como sacerdote di iglesia Santa Cruz de Roma, na ciudad di Panchimalco na sur di San Salvador, pa motibo di ser acusa di dos caso di abuso sexual.
“Despues di ser haya culpabel, e tres sacerdotenan a ser condena pa iglesia na perdida total y definitivo di tur funcion di sacerdote y no por continua cu nan funcion, segun canon 292 di Codigo di Derecho Canonico” Escobar a informa. “Iglesia no tin tribunal cu por sanciona cu prizon. E sancion mas grave ta destitucion y sancion di caracter moral”
