(AP) — Bob Iger, e ehecutivo di entretenimento cu a trece Star Wars, Pixar y Marvel bao marca Disney y a reta e dominio di Netflix den streaming, ta bay reemplasa su sucesor, CEO Bob Chapek, kende su dos aña al mando tabata marca pa conflicto, eror y un prestacion financiero debil.
E desaroyo sorprendente ta yega dos siman despues cu e prestacion financiero di Disney e kwartaal ultimo a cay hopi abao di expectativanan di Wall Street tanto pa profit como revenue, algo inusual, ocasionando caida di 12% den accionnan.
Stock di e compania a aumenta mas di 6% dialuna cu nombramento di Iger efectivo inmediatamente. Asina mes e stock ta 37% abao e aña aki.
“Ta cu un sentido increible di gratitud y humildad – y mi mester admiti, un tiki asombro – cu mi ta skirbi na boso awe nochi cu noticia cu mi ta bolbe The Walt Disney Company como CEO”, Iger, 71, a skirbi den un email na empleadonan. E tumulto na Disney a yega rapidamente cu reportahenan cu miembronan di e hunta a acerca Iger inicialmente pa bolbe mesora diabierna.
Iger a separa completamente di Disney fin di aña pasa despues di keda abordo pa dos aña como hefe ehecutivo, yudando guia Chapek y garantisando un transicion suave.
E transicion ey no a resulta nada suave, y diadomingo, Iger a bay di acuerdo cu un contract di dos aña pa redirigi trayectorio di Disney y yuda haya un hefe ehecutivo nobo.
Iger tabata cara publico di Disney durante 15 aña como CEO prome cu a entrega mando na Chapek na 2020, un tempo den cual el a compila un ola di victoria elogia den industria di entretenimento y pa fanaticonan di Disney.
Chapek a supervisa Disney durante un di e periodonan mas dificil den historia di e compania, cu a cuminsa cu e pandemia y a termina, al menos bao direccion di Chapek, cu inflacion.
Pero su tempo como hefe ehecutivo tambe tabata marca pa loke hopi a mira como erornan no forsa pa un compania cu, bao Iger, tabata parce di no por comete eror.
E compania basa na Burbank, California a haya su mes den un pelea publico cu Gov. Ron DeSantis di Florida – unda Disney ta maneha e resort y parke gigante, Walt Disney World – cu a implementa un medida cu ta prohibi instruccion riba orientacion sexual y identidad di genero den scolnan primario te cu derde klas, un regla cu criticonan a tacha como ley “no bisa gay”.
Inicialmente Chapek a keda den silencio den publico, y esey a genera problema entre empleadonan. Ora Chapek a denuncia e medida, a genera un reaccion politico entre legisladornan conservador y noticieronan pushando boycott y tachando Disney como demasiado “woke”.
Lunanan despues, Chapek a duna retiro na Peter Rice, presidente di Disney General Entertainment Television, entre e ehecutivonan di television regarda mas altamente den e industria. E retiro a sorprende Hollywood y a lansa critica nobo for di inversionistanan pa cu liderazgo di Chapek.
Tabata altamente inusual pa conflictonan na Disney bay den esfera publico, pero corecto of incorecto, ta parce di ta un caracteristica bao Chapek.
Un pelea cu un strea top di Hollywood a bira publico aña pasa despues cu Scarlett Johansson a demanda Disney pa su pago den Black Widow. E ganashi potencial di Johansson tabata mara na prestacion di e pelicula di Marvel 2021 den cinema, cual e compania a lansa simultaneamente den teatro y su servicio di streaming Disney+.
Durante ultimo simannan, mas duda a bin riba e plannan di Chapek pa reduci gasto, incluyendo reportenan di plannan pa retironan mayor, mientras devotonan di Disney a keha di aumento di prijs na parkenan Disney.
“E hunta a conclui cu mientras Disney ta bay den un periodo cada bes mas compleho di transformacion di e industria, Bob Iger ta unicamente posiciona pa lidera e compania durante e periodo clave aki”, Susan Arnold, presidente di Disney, a bisa den un declaracion.
