E director ehecutivo di e Agencia Internacional di Energia (International Energy Agency;IEA), Fatih Birol, a sigura cu un profundisacion di e caida di produccion petrolero Venezolano lo por impulsa prijs di crudo y ta considera esaki un di e elementonan clave pa establece e prijs mundial e aña aki.
“E caida di e produccion na Venezuela ta esun mas grandi den historia di e industria den ultimo 30 aña. Loke por sucede cu Venezuela por ta un di e sorpresanan e aña aki”, Birol a bisa den un entrevista cu Bloomberg TV.
Venezuela a perde como 151.000 bari pa dia di produccion di crudo na december, acelerando un collapse den tur e divisionnan operativo di e empresa estatal Pdvsa, di acuerdo cu cifra preliminar extraoficial, obteni pa e agencia Argus Media di tres ehecutivo di e compania.
E pais a registra na ciere di luna di december 2017 un produccion promedio di 1.686.000 bari di petroleo diario, despues di un perdida acumula di 687.000 bari pa dia den 12 luna.
E hefe di e organisacion di e principal consumidornan di energia na mundo, a agrega cu un prijs mas halto di petroleo tambe lo stimula e actividad di fracking, di cual e ta anticipa cu por ta e otro sorpresa den e mercado pa 2018.
“Mientras menos e produccion di Venezuela ta, den comparacion cu e cifranan actual, e prijs di crudo por subi”, Birol a afirma, aunke e ta sigura cu nan no ta anticipa un aumento significativo di prijs di petroleo, cu siman pasa a yega na US$70 pa bari.
E presidente di Pdvsa y ministro di Petroleo, Manuel Quevedo, a reconoce diadomingo pasa e caida di produccion, pero a sigura cu e empresa ta trahando pa cera aña (2018) cu un produccion diario di 2,5 miyon bari pa dia.
Nota di redaccion: Venezuela tabata conoce un produccion di 3,4 miyon bari pa dia na 1998. Na 2007 produccion a mehora te e nivel aki despues di e caida di produccion den e welga di 2002/2002. Na 2016 produccion tabata na 2,4 miyon bpd ainda, pero den curso di 2017 a cay te na 1,68 miyon bpd na december ultimo.
