Exposicion Historia di Deporte:

ORANJESTAD – Archivo Nacional Aruba (ANA) a organisa un exposicion ‘Historia di Deporte’, den cuadro di Dia di Himno y Bandera. E exposicion aki no ta abarca tur disciplina deportivo, sinembargo e ta rescata parti di e memoria di nos heroenan nacional den diferente disciplina deportivo den diferente epoca.

Na comienso di e exposicion tambe ta wordo reconoci e logronan cu e generacion di deportistanan nobo a logra conkista poniendo e nomber di Aruba resona internacionalmente.

Durante un soft opening, director di ANA, Raymond Henandez den presencia di parlamentario Endy Croes, kende ta un promotor di deporte a realisa e apertura di e exposicion aki. Den e acto aki tabata presente un grupo di veterano deportista kendenan den nan tempo di gloria a skirbi un capitulo importante den historia di deporte nacional, entre nan e ex boxdo, Harry Croes y Clyde Harms kende tabata un deportista multi facetico, y tambe e pelotero Elio Nicolaas. Nan tur a duna nan contribucion cu nan archivo personal ya sea potretnan y articulonan pa duna contenido na e expo aki.

Sr. Hernadez a bisa cu den e proceso di instalacion di nan expo, nan a mira diferente di nos glorianan di deporte cu a bay bishita ANA. “Tin algun di nan cu a bira mas entusiasma cu nos mes tabata ta,” el a declara durante un breve discurso.

Cada bes cu nan ta organisa un expo, nan ta siña algo. Pues e no ta trata di simplemente presenta algo cu nan tin den nan archiefnan. Pero e tipo di exposicion aki ta refresca e memoria di cosnan cu talbes nos a lubida riba dje. Awendia e por scucha cu masha poco ta wordo haci pa deporte. Mientras el a trece dilanti cu for di tempo cu Lago y e frère de La Salle a bin Aruba, un enfasis grandi a wordo haci den deporte escolar. Te hasta competencia grandi a wordo organisa di scolnan secundario masha competitivo den Lago Sport Park.

Tambe e expo aki ta rescata e memoria di e frère Edgar kende tabata un persona masha activo pa stimula e muchanan e amor pa deporte. ANA a ricibi un caha for di Hulanda yen di potretnan cu ta mustra con dedica e frère aki tabata ta riba e tereno aki. Nan a dedica un espacio special pa rescata e memoria di e frère aki, ya cu el a haci un trabou grandi y lamentablemente no mucho hende a yega di tende di dje.

E ta lamenta cu ultimo añanan practicamente e tipo di actividad aki a disparce completo. Un aporte di e expo aki lo ta pa rescata ideanan cu a yega di funciona exitosamente den pasado, y kisas cu un bachi nobo nan por funciona pa entusiasma nos hubentud riba tereno di deporte.

Coordinador di e expo aki, Nelson Thiel a gradici tur instancia y persona cu a haci posibel cu nan por a organisa e exposicion aki, specialmente ADA (Amigo Di Archivo), pero tambe tur colega cu a yude pa hinke den otro e exposicion aki. Nan tin 12 aña cu nan ta bin organisado exposicion den cuadro di nos dia nacional.