Bo tabata sa cu presion halto riba su mes no ta duna señal of sintoma. Esaki por nifica cu bo por tin presion halto pa añanan largo sin cu bo sa. Pa e motibo aki nan ta yama presion halto ‘silentkiller’.
Rond mundo ta celebra dia 17 di mei Dia Mundial di Presion Halto. Rond mundo ta celebra e fecha aki cu diferente actividad. Pa e aña aki a scoge e tema: ‘Midi bo presion corectamente, control’e y biba mas largo’. E aña aki nos kier enfoca riba e importancia di midi presion regularmente y corectamente.
E cifranan di investigacion di Salud, Gezondheidsonderzoek Aruba 2016/2017,ta indica cu 63% di nos poblacion di 20 aña bay ariba a midi un presion halto. Den e investigacion aki a categorisa e persona cu presion halto ora e cifranan di midimento di presion ta riba 140/90 mmHG.
Presion halto pa un largo tempo por causa daño na bo curason, ader, celebro, riñon y otro parti di bo curpa. P’esey ta importante pa midi bo presion regularmente, aunke bo no ta sinti nada. Corda presion halto no ta duna sintoma! Si bo presion ta bon, sigui mantene un estilo di bida saludabel. Si bo presion ta halto ta bon pa haci e cambionan necesario pa asina baha e presion y evita daño na bo organonan. Tambe presion halto por ta un factor di riesgo pa complicacion cu COVID-19.
Riba Facebook di IBiSA y miembronan di Plataforma Promocion di Salud (e.o. DVG, Hospital, WGK, AZV, SVb) lo comparti diferente informacion grafico tocante con pa midi bo presion corectamente y con pa scoge bo cuminda cu menos salo.
IBiSA y Plataforma Promocion di Salud ta invita henter pueblo pa sigui cuida bo mes y subi riba nos Facebook page y informa bo mes tocante un bida mas saludabel.
