Fin di siman cu a pasa, delegacion di atletanan di scol basico y MAVO di Curaçao y Bonaire a yega Aruba pa participa den e weganan Interinsulair 2016 caminda nan a haya un bunita bon bini na Centro Deportivo Betico Croes y despues a sigui cu weganan di futbol di sala.
Monique van Embden, Directora di IBISA, ta conta Bon Dia cu tur aña bo ta haya cierto
dificultadnan pa locual ta parti di organisacion y un di e cosnan cu tur aña ta bin bek ta e recursonan cu ta keda un tiki limita. Sinembargo Sra. Embden ta sigui bisa cu nan a siña adapta cu esaki anto e dificultadnan manera vuelonan, transportacion y treciendo e muchanan hunto nunca ta bay ta un trabao facil pero tampoco imposibel.
” E ta rekeri hopi pa logra esaki, pero na mesun momento, ora cu bo ta para akiden na e apertura bo ta mira con tur cos tabata bale la pena. Bo ta mira e muchanan di diferente cultura ta pasa bon y esaki ta pone bo sinti bon despues di tanto esfuerso” , Sra. Embden ta bisa. Minister Dr. Alex Schwengle tambe tabata presente pa duna e muchanan di Curaçao y Bonaire un bon bini na Aruba y oficialmente habri e weganan Intersulair 2016 den e ceremonia na Centro Deportivo Betico Croes.
Bishitando otro paisnan mientras bo ta representando bo pais ta algo hopi bunita pa e muchanan aki experiencia. Fuera di e experiencia deportivo, nan ta papia y conoce muchanan di otro pais y scolnan cual ta trece un balor social y educacional hopi grandi tambe.
E team di IBISA a bishita diferente scolnan durante e fin di siman aki caminda diferente actividadnan deportivo y social a tuma luga. Na Colegio Santa Teresita muchanan a mustra nan interes den siña baila e cantica Hupsakee. A bishita entre otro tambe Fontein Kleuter School, Traimerdia Conrado Coronel, Colegio Hilario Angela y st. Paulus School.
Pa locual ta e weganan di Futbol di sala entre otro Curaçao y Bonaire a empata 2-2 despues di un wega intensivo y na Sporthal St. Cruz. (Centro Deportivo Betico Croes). Tambe tabata tin competencia di atletismo na CD Guillermo Trinidad entre Aruba, Bonaire y Curaçao.
E muchanan di Curaçao y Bonaire a cuminsa prepara pa biaha bay bek cas despues di un desayuno na Double Down Sports bar & grill diadomingo mainta.
