Na Aruba vaping ta creciendo particularmente bou di e generacion jong. Esaki a keda comproba den e ultimo encuesta di salud nacional STEPS 2023. Un cantidad di 10.5% den e edad di 18-29 aña ta haci uzo di e-cigarettes.
E-cigarettes ta un aparato cu ta traha riba bateria cu ta bin den diferente forma: parecido na sigaria, pen of un aparato sofistica y atractivo. Uzadonan ta inhala un vapor cu sabor di fruta y ta saca un ‘huma’ parecido na sigaria.
Hopi hende ta pensa cu vaping ta menos dañino cu humamento. Aunke cu ta berdad cu huma di vape tin menos contaminacion cu tabaco, toch e no ta safe. E nicotina den e e-cigarettes ta peligroso pa e uzado y e hendenan rond di dje. Nicotina ta adictivo y por afecta e celebro di mucha y hoben. Tambe e por afecta e baby den barica di mama cu ta vape.
Banda di nicotina e-cigarettes ta contene tambe diferente substancianan peligroso manera diacetyl. Diacetyl ta un kimico cu por causa malesanan di pulmon serio. Banda di esaki e ta contene metalnan manera nikel y chumbo y kimiconan cu por causa cancer. E likido cu ta wordo uza den e e-cigarettes por ta hopi peligroso, mucha y adulto a venena dor di guli of hole esaki.
Companianan di tabaco ta gasta mas cu $8.2 biyon na mercadeo agresivo pa aña cu ta mas cu $22 miyon pa dia! Ban para fuerte den nos sapato y no laga e propagandanan di tabaco influencia y gara un generacion nobo di humado y adictonan na nicotina.
Humamento ta y ta keda un peliger pa salud, sea den forma di sigaria, siga, tabaco di kauw of den un forma mas moderno y sofistica cu ta via vaping.
