Dicon un hoben/adulto cu no ta huma ta mas fit cu un cu ta huma?
Pa por haci actividad fisico riba un bon nivel, bo curason, pulmon y musculo mester di sanger cu hopi oxigeno (oxygen/zuurstof). Ora bo ta inhala huma di tabaco, tin un substancia malo den e huma cu ta pega na e celnan cora di bo sanger. Resultado di esaki ta cu bo sanger por carga menos oxigeno pa e musculonan y otro parti di e curpa.
Esaki ta causa tambe cu e acido lactico (lactic acid/melkzuur) cu bo musculonan ta produci durante di actividad fisico ta subi door cu e sanger no tin suficiente espacio pa hib’e pa wordo saca for di e curpa. Acido lactico ta pone e musculonan sinti cansa, kima y stijf despues di actividad fisico. P’esey ora bo ta un humado, actividad fisico y deporte ta sinti mas pisa y bo ta cansa mas lihe. No ta solamente actividad fisico y deporte ta sinti mas pisa sino e actividadnan di tur dia manera p.e. subi trapi of cana un distancia bay auto of den supermercado.
Investigacion a mustra tambe cu persona cu ta huma ta yega na su limite di cansancio mas lihe cu un persona cu no ta huma. Ademas nan no por core mesun leu of duro.
Hopi hende ta kere cu humamento ta causa inflamacion solamente den e pulmonan. Humamento ta afecta bo wesonan y ‘joints’ tambe, strobando bo movecion y bo actividad fisico.
Bo kier ta mas fit y hiba un bida mas activo, saludabel y energetico? No huma of laga humamento un banda y goza di e beneficionan cu actividad fisico y deporte ta trece pa bo curpa y mente!
