IBiSA ta informa den conexion cu Dia Mundial sin Tabaco; Con humamento ta afecta bo actividad fisico y deporte

Humamento ta haci daño na bo habilidad pa haci ehercisio, deporte y di ta fisicamente fit. E ta afecta bo curpa y tambe con bon y efectivo bo por haci actividad fisico y deporte. Humamento ta afecta bo curpa riba diferente forma.

Sanger

E nicotina y otro substancia produci door di humamento por haci bo sanger ‘pegahoso’ y hanchura di bo adernan por bira mas smal. Adernan smal ta baha e fluho di sanger pa bo curason, musculonan y otro organonan cu ta haci actividad fisico mas dificil.

Curason

Humamento ta pone e curason bati mas biaha durante descanso ‘resting heart rate’. E cantidad di biaha cu e curason ta bati pa minuut ‘heart rate’ ta bira mas hopi door di e trabou extra cu e mester haci pa mantene e funcion normal di e curpa.

Pulmon
Bo por haci actividad fisico y deporte miho si bo capasidad y funcionamento di e pulmon ta bon. E residuo (tar) den e huma di sigaria ta forma un capa den e pulmon y ta haci’e menos flexibel y efectivo. Humamento ta produci tambe slijm cu por stroba e pulmon di funciona bon. Pesey ora bo ta huma bo ta cansa mas lihe. Hasta ora bo huma un par di cigaria pa dia so, e ta stroba bo pulmon di funciona bon.

Actividad fisico y deporte por ta un parti importante den bo plan pa stop di huma. Actividad fisico ta baha e gana pa huma y ta yuda’bo maneha e falta di nicotina y reduci stress. Uza actividad fisico y deporte pa yuda’bo stop di huma! Bo por papia cu bo dokter di cas pa mas informacion y conseho.