Den presencia di e management team di Ibisa, minister Dangui Oduber a anuncia cu e departamento aki ta bay resorta back bao e ministerio di Deporte y no mas bao ministerio di Salubridad Publico.
E ta spera cu den futuro niun minister di Deporte no lo haci e cambio aki mas. “Pasobra semper Idefre a forma parti di e ministerio di deporte,” el a declara.
E mandatario a bisa cu na aña 2017 nan a pone den nan programa di gobernacion cu e departamento di Ibisa – cu antes tabata carga e nomber di Idefre – tabata pa Ibisa bay resorta back bao di ministerio di Deporte.
Semper den pasado – segun e mandatario – e departamento aki tabata resorta bao e ministerio di deporte. Sinembargo durante gabinete Mike Eman I a dicidi di cambia esaki door di ex minister Richard Visser. Nan a dicidi pa Ibisa resorta bao ministerio di Salud. Pero den nan opinion, minister Oduber ta considera cu Ibisa ta un departamento di Deporte.
El a bisa cu actualmente Ibisa ta wordo maneha pa un team despues cu su director a bay cu VUT. E management team cu a cuminsa na maart ultimo tabatin como prome tarea pa haci un investigacion y evalua cual tabata e posibilidad pa haci e cambio cu ministerio di Deporte tin deseo di ehecuta pa restructura Ibisa. Un di e cambionan ta cu nan ta bay presenta e decision di e cambio aki na Conseho di Minister pa asina oficialmente e departamento di Ibisa ta bay resorta back bao e ministerio di Deporte.
E ta convenci cu Ibisa ta un departamento importante den cuadro di prevencion di salud y participacion di nos comunidad na deporte. Y awor cu nan a bin cu e cambio aki cu Ibisa ta bira un departamento oficial cu ta cay bao ministerio di deporte, nan ta bay enfoca mas riba e parti di deporte. Mientras cu departamento di Salud Publico ta bay enfoca riba e parti di salud. El a bisa cu naturalmente e dos departamento aki ta bay traha hopi estrecho cu otro.
