Den un entrevista cu miembronan di management team di IBISA (Instituto Biba Saludabel y Activo), Edgar Erasmus y Wladimir Wolff a splica nos un poco mas tocante proyectonan cu IBISA tin actualmente pa yuda hobennan den desaroyo scoge un caminda positivo y tambe a splica con e proceso di maneho a bay durante e pandemia di COVID-19.

 

Un di e proyectonan cu IBISA tin actualmente ta e proyecto Hoben Activo, Hoben Feliz, cu ta tuma luga despues di scol na diferente bario. “IBISA, conhuntamente cu ministerio di deporte, a bin cu e proyecto Hoben Activo, Hoben Feliz, cu ta un proyecto despues di scol pa muchanan di 9 pa 12 aña, unda cu ta brinda e muchanan e oportunidad pa nan practica diferente tipo di deporte bou guianan profesional,”, Edgar Erasmus a bisa.

 

IBISA a amplia e proyecto aki, cu inicialmente a cuminsa na IBISA sportcentrum na San Nicolas, y a cuminsa cu esaki na diferente otro bario pabou di brug. “Nos tabata na Club Estrella, nos tabata na Simon Antonio, Dakota, y asina nos a extende. E idea ta pa sigui haci esaki mas den otro districtonan y esaki ta un manera pa stimula e muchanan pa ta involucra cu deporte”, Sr. Erasmus a agrega.

 

Wladimir Wolff ta splica cu “e esencia di dje ta cu nos ta acerca e clubnan cu tin den e bario, e club ta bin y por ehempel na San Nicolas pa 4 siman nan a bin duna baseball, e otro 4 siman porta futbol ta bin duna e les, tennis etc., anto nos ta laga e mucha ser conoci cu diferente deporte. Porta e mucha no a gusta e futbol, pero su cos ta tennis, anto e ora e intencion ta pa despues e afilia na e club, sigui train y mehora den e deporte cu e ta gusta”.

 

Aparte di e proyecto Hoben Activo, Hoben Feliz, IBISA tin proyectonan cu ta tuma luga durante scol tambe. “Nos tin algun instructor cu ta duna gym na scolnan y tambe nan ta stimula e parti di deporte escolar den scol y despues di scol den un forma competitivo contra otro, scolnan por inscribi y participa”, Sr. Erasmus ta splica. “E deporte escolar ta cuminsa for di ora cu scol habri te cu mei, di september bin ariba scolnan ta participa den diferente competencia di deporte y asina nan ta clasifica y despues hunga e final nan den olimpiada escolar cu ta tuma luga den luna di mei”.

 

Durante e pandemia mayoria deporte organisa a para y aunke IBISA no tin cifra concreto pa locual ta participacion di deporte en general prome cu COVID-19, aworaki cu normalisacion di protocolnan deporte escolar si a mira un participacion grandi. “Den deporte escolar nos tin sigur, den olimpiada escolar 2019, un 1300 pa 1500 mucha cu a participa den diferente deportenan escolar”, Sr. Erasmus a bisa.

 

Actividad fisico na Aruba en general tambe a mira un aumento, “nos no tin cifra, pero nos por mira si cu hopi hende ta move mas awo, nos ta mira un tiki crecemento den e parti di movecion”, el a agrega.

 

E variante di COVID-19, Delta, ta batiendo na porta, y en caso cu tin un siguiente ola di infeccion, IBISA tin un proceso na luga cla caba pa por yuda maneha situacion.

 

“Di COVID-19 nos a siña hopi. Nos a desaroya un protocol general, hunto cu e otro organisacionnan deportivo, manera Comite Olimpico Arubano (COA), Aruba Sport Unie (ASU) y e federacionnan di deporte, na unda nos di IBISA tabata bay bishita e acomodacionnan deportivo y nos tabata controla si tur cos tabata conforme e protocol cu tabatin. Nos a yama e proceso e Guia Deportivo pasobra eigenlijk nos no ta bay controla, nos ta bay guia e personanan pa haci tur cos mas corecto cu ta posibel”, Sr. Erasmus a splica. “Si bin un ola di covid atrobe, nos tin un plan di salida cu nos por sigui traha riba dje, pero nos no sa kico lo por pasa, dus e plan aki nos por ahusta na tur momento depende con e situacion ta, y ta importante pa menciona cu finalmente e decisionnan final ta keda na crisis team” el a agrega.

 

Erasmus y Wolff ta sigura cu IBISA lo continua cu nan proyectonan y nan ta dispuesto pa traha cu tur otro partner den deporte pa mehora. “Nos lo kier traha cu tur otro partner, nos kier crea un cultura di profesionalismo, pa asina nos traha na bienestar di deporte na Aruba en general, pa tin un miho structura di deporte na unda e tareanan ta wordo reparti y tur hende ta contribui na tur loke ta movecion cu tin beneficio pa e capital humano”, Sr. Erasmus a bisa.