Durante tempo actual den cual mayoria di hende ta keda cas, e habito di keda cu persona cu no ta haci movecion, of ta keda henter ora ta wak television of programa, por conduci cu ta lubida e importancia di ehercicio.
Sheryl Arends-Croes, dietista di Ibisa, ta splica con e estilo di bida di un persona por cambia. Usualmente, hende no ta ripara con lihe por subi peso si keda come na cas, cu e mal habito di no kima vet of no haci suficiente ehercicio. “Mester balansa locual ta come y movecion.”
Ehercicio ta importante. Si come mas, peso ta subi, y e balans di movecion ta baha. Mester move mas pa tene e balans entre comemento y movecion. “Movecion mester ta igual pa bo tin un peso normal.” Arends-Croes ta bisa cu esey ta consehonan con pa anda cu cuminda y biba saludabel.
Bon Dia Aruba a puntra Arends-Croes, mirando cu tin hende cu ta opta pa no haci ehercicio, hasta sabiendo cu ta bon pa nan. Pakico esaki? Arends-Croes ta contesta cu cada persona mester busca un ehercicio di cual ta deriva placer. “Mester keda dibertido pa bo, sea ta cana, core, landa, zumba, cualkier actividad di ehercicio cu ta pone e persona activo y den movemento.”
Un persona por come saludabel y no haci ehercicio? Arends-Croes ta contesta cu esaki ta posibel, pero normal ta pa e dos bay hunto, come saludabel y haci ehercicio modera. Pero pa un bida saludabel, mester inclui ehercicio.
Ademas, e ta remarca cu si ta come mas caloria, mester haci mas ehercicio, pa percura pa e balans lentamente yega na unda e persona kier yega pa mantene un peso saludabel. “Tin manera di come saludabel, pone tips con pa come asina. Ta saludabel y cambia bo comportamento y manera di mira cuminda. Come ora bo tin hamber, cosnan cu ta bon pa bo. Asina ta perde peso y mantene”, el a splica.
