Ayera mainta, dirigencia di Ibero American High School a duna un rueda di prensa pa duna nan banda di e asunto, despues cu un noticia tocante un caso di violacion a sali den un medio digital. Den e caso tabata envolvi supuestamente un docente y un alumno cu lo tabata e victima.
William Centeno, director di e scol, acompaña pa Ingrid Kuiperdal, kende ta e vice-director di e scol, y office manager di e scol, Tico Monte, a sinta dilanti di medionan di comunicacion pa duna un declaracion tocante e caso. El a lamenta cu prensa no a busca, for di prome momento, contacto cu e scol pa mesora por a duna e informacion corecto den e caso aki. Esey lo a haci e rueda di prensa innecesario.
Asina Centeno a coregi cu e victimario no tabata un docente sino e IT manager di e scol. E caso a tuma lugar como dos luna pasa, y loke e scol a haci, segun Centeno, ta nan propio investigacion interno. Esaki a conduci na retiro di e persona tres siman pasa.
Loke ta e parti mas dramatico den e actual situacion ta cu e victima ta pasa den mal momento atrobe cu tur e publicidad, di tal forma cu segun e director, e alumno no a bin scol mas. Ta importante cu den e tipo di caso aki e interes di e victima mester bin na prome lugar. Cu e publicidad cu a surgi awor, esey no ta caso.
E director a sigura cu Ibero American High School, den e 15 aña di nan existencia ta mantene e standardnan mas halto cu tin y no ta tolera ningun tipo di acto inmoral o no etico, ni di studiante, ni di docente y personal.
Riba pregunta di prensa pakico no tabatin denuncia haci pa e scol na autoridadnan hudicial, e contesta tabata cu asina leu cu e scol tabata na altura, e famia mes a atende e caso cu polis caba y por lo tanto no tabata necesario pa haci esey. Tambe a conta cu polis y servicio social a acudi na scol pa atende e caso. Tambe a informa cu e scol a ofrece e victima consulta gratis di un psicologo, cu tabata encera disponibilidad 24/7 di e profesional aki.
Den e discusion cu prensa presente, director Centeno a lamenta cu e caso a sali den prensa di tal manera, aunke di banda di e prensa concerni a bisa cu no a pone ni nomber ni potret. Riba esaki Centeno a reacciona bisando cu esey no ta kita cu dentro di poco tur hende sa toch ta ken ta e victima, cu ta sinti su mes asina malo cu tur e publicidad cu di baina e por cana riba caya. Manera bisa anteriormente, e no a bin scol mas tampoco. E director finalmente a keda insisti cu mester tin un miho manera pa trata e asuntonan aki, tumando e interes di e victima como prioridad.
