Bon Dia Aruba a tene un entrevista cu Tico Monte, kende ta Office Manager di Ibero American High School. El a splica nos con e proceso di forma e scol a lanta y con tur cos a cana pa ta un scol reconoci na Aruba.
Ibero American High School a cuminsa manera un fundacion cu nace dia cu a lanta un instituto pentecostal. Monte a bisa cu prome el a cuminsa como un ‘Day Care’ for di 2003, pasobra tabatin falta pa esaki cerca e muchanan Latino.
E ta duna di conoce cu muchanan no tabatin scol e tempo ey, tabata cana riba caya. Awo tin e sistema di Prins Bernard. E tempo ey e doño, Andy Centerno hunto cu su casa a pensa di lanta un scol.
Monte ta splica cu a cuminsa e Day Care na Lago Heights, despues Pos Chikito anto el a sigui bay te ora nan a yega postkantoor. “E muchanan mes tabata bisa cu nan no kier keda asina y nan kier sigui un enseñanza, pa nan sigui bay dilanti.”
For di e momento ey a cuminsa forma e scol stap pa stap. Sinembargo, Monte a bisa cu a bin cu un cambio completo na Postkantoor. Cu a cuminsa nota cu a cuminsa haya hende local cu mucha Latino. Tambe a ripara cu e temporada di cambio di scol, manera EPB, e mayornan a cuminsa inscribi nan yiu na e scol.
Pa es motibo a cuminsa forma klas, pero na 2008 nan mester a sali for di postkantoor. Nan a wak cu e tempo ey tabatin un edificio liber na San Nicolas. Esey tabata antes e oficina principal di FADA. Ora nan a haya e edificio, a bisa cu tabata un trabou duro pa e mantencion, ya cu a haya henter e luga den mal estado. Sinembargo e ta bisa cu a cuminsa drecha ‘poco poco’ anto cuminsa busca e material y mas cos pa forma un klas. “Nos a cuminsa cu nos propio forsa, drecha e luga. Pero tambe a cuminsa cu e pensamento cu nos mester ta acredita y tin e reconocemento.”
Nan a haya sponsor di Merca, pa motibo cu tabata Cristian y e comunicacion entre Cristianismo tabata bon. Nan a wordo poni cerca un persona cu tabatin scol pa asina por cuminsa proceso di acredita. Esey tabata e ACTS (Accreditation Christian Teachers and Schools) cu a haya sponsor pa nan.
“Nan a bin mustra nos kico mester a haci pa traha un curriculum nobo. Mester a busca docente nobo. Te na 2011 a caba cu nos a haya acreditacion cu ACTS, sinembargo esey no tabata suficiente, pasobra awo mester acredita di un agencia cu ta wordo reconoci pa gobierno”, Monte ta splica.
Cu a acreditacion di ACTS, nan a bay gobierno unda a sinta cu nan, splica nan punto y a cuminsa e proceso. Un aña despues, Monte ta bisa cu e scol a wordo acredita pa agencia di Middle State, cu ta reconoci pa gobierno di Aruba.
Prome cu esey, Monte ta bisa cu tambe a wordo acredita pa asociacion consulado grandi na Merca di scol priva. Anto pa motibo di esey nan por a bay Middle State.
Despues nan a yega cu nan mester a tuma tur e buki y haci curiculo pa manda esaki pa gobierno, mand’e Directie Onderwijs unda cu el a haya aprobacion, na aña 2013 a wordo reconoci pa gobierno.
Na aña 2015 nan a bolbe haya aprobacion. Monte ta splica cu cada 5 aña tin cu keda sigui cu proceso di acredita, pasobra nan ta bin inspecciona, controla y wak si tur klas y docente ta acredita. Anto asina nan ta sigui e proceso.
A puntra Monte, si e docentenan na e scol ta local. El a contesta cu dos di nan ta local, pero tur otro ta di afo. Esaki pa motibo cu nan tin cu papia bon Ingles y ta conoci di studia na universidad den Ingles, pasobra tur papel y cosnan ta bay na agencia di acreditacion. Unda cu si tur cos cana bon, nan ta duna e ‘okay pa docente por drenta den servicio’.
E studiante di Ibero ta haya e 4 idioma como materia, pero e lenga principal ta keda Ingles. Tambe nan ta duna bijles na nan studiante. Si nan mira cu un mucha tin dificultad pa sigui den un materia, e ta wordo manda pa ricibi bijles.
Monte ta bisa cu nan orario di scol ta di 8or di mainta te cu 3or di atardi y cu di 2or pa 3or nan ta haya nan bijles. “Unabes e mucha wordo apunta pa bijles, esaki ta obligatorio, e mucha mester presenta. E bijles aki ta inclui cu e prijs cu e mucha ta paga normalmente na scol. Nan ta hay’e normal tur dia y un docente ta splica tur cos cu e mucha no ta compronde.”
Di e forma ey ta haci cu e mucha ta mas productivo. Ta 12 aña pa caba Ibero American High School.
“Casualmente e aña aki nos a gradua un mucha cu a keda cu nos henter e 12 aña. Awo el a bay studia na universidad di Aruba”, Monte a expresa. A puntra Monte e cantidad di studiante cu tin na scol. El a contesta cu nan tin 300 alumno y no ta tuma mas cu esey, pa motibo cu ta prefera pa e grupo di studiante no bira demasiado grandi, y di forma ey no tin tereno pa desaroya.
Kico ta un diferencia entre Ibero American High School y otro scolnan di Aruba? Monte ta splica cu nan sistema por yam’e ‘student friendly’, pasobra e studiante por yega pa conseho na tur sorto inkietud of pregunta cu nan tin.
