Ayera mainta, Prome Minister Evelyn Wever-Croes a bisa cu berdad for di hopi tempo ta existi un gran interes riba refineria.
Nan a yega di elabora un lista di alrededor di 50 compania cu a expresa nan interes pa refineria of e tankinan di deposito di combustibel. Dia 15 di mei a cera e destaho publico pa esunnan interesa pa huur e tankinan.
Refineria di Aruba (RdA) a acumula e nombernan di esunnan mas interesa y conveniente pa Aruba. Aworaki nan ta den proceso di screening. Pero e huurmento di e tankinan lo ta uno temporal, mirando cu si ta resulta un interesado pa opera e refineria, seguramente nan mester di e tankinan aki.
Tur interesado lo bay haya un carta riba e dos proceso di Request For Expresion Of Interest (REOI). E interesadonan aki lo wordo hinca den e proceso nobo pa nan participa den e destaho publico aki.
Pero inicialmente gobierno a dicidi di no bay mucho pura pa bin asina cu un procedura mas transparente y integro cu ta posibel, el a declara. Awor e companianan aki mester bin expresa ‘nan interes di berdad’, el a bisa. E ta consciente cu actualmente debi na efecto di e pandemia riba e mercado di e crudo, esaki ta un periodo cu no ta mustra ideal pa e tipo di industria aki.
Pa participa den e destaho publico cu a cuminsa ayera y cu ta culmina dia 17 di juli, nan mester presenta documentacion mas solido, y no gewoon un simpel interes. E mandatario a bisa cu nan ta usando e termino of periodo cu internacionalmente ta wordo usa den e tipo di proceso aki.
El a agrega cu internacionalmente ta duna 6 pa 8 siman pa expresa interes. Gobierno ta hacie na 6 siman, considerando e interes cu tabatin caba. Despues nan ta bin cu un periodo di cuatro siman pa asina un comision special evalua e interes cu a wordo haci via e destaho aki.
Pero nan no kier limita nan mes na esnan cu a yega di expresa nan interes riba nos refineria caba. Sino cu nan kier habri horizonte -segun e mandatario- pasobra nan ta convenci cu por duna Aruba mas oportunidad.
