Falta di claridad den regulacion y condominio ta contribui na crecemento di economia paralel

Anteriormente e siman aki, Bon Dia Aruba a publica un articulo tocante uso incorecto di tereno erfpacht pa vivienda, y e impacto di esaki riba e mercado di vivienda pa local. Den e articulo aki, ta analisa e efecto riba creacion y fomentacion di un economia paralel.

Aruba ta bin luchando cu escasez di vivienda pa añas. Mientras cu localnan ta hay’e cada bes mas dificil pa sigura vivienda pagabel, apartamento, cas y specialmente condominio ta ser cumpra – hopi biaha pa inversionista stranhero – huur na turista a traves di plataformanan manera Airbnb y VRBO. E practica aki no solamente ta distorsiona e mercado di vivienda, sino tambe tin consecuencianan amplio pa e economia informal di Aruba, manera resalta den e documento di politica di DEACI na 2021.

Segun e rapport di DEACI na 2021, economia informal ya ta conta pa 30 porciento di GDP di Aruba. E calculacion aki ta prome cu e crecemento explosivo di short-term rental mediante plataformanan digital y ta inclui principalmente sectornan manera construccion, labor informal y benta no registra. Awendia, short-term rental na turista ta representa un dominio mayor y creciendo rapidamente dentro di economia informal – costando gobierno miyones den entrada perdi.

Sin permiso, sin impuesto, sin supervision

Hopi di e unidadnan di huur aki ta opera sin permiso pa turismo, sin e registracion rekeri cu oficina di Impuesto, y sin paga contribucionnan social. No ta paga ni impuesto di turismo ni impuesto di entrada, maske esakinan ta rekeri legalmente. Ademas, limpiesa, mantencion y maneho di e unidadnan aki hopi biaha ta sucede sin contractnan formal di labor, contribuyendo na trabao no registra y tin biaha mal paga.

Esaki ta crea un capa dobel di inhusticia: hotel y negoshi di huur formal cu ta cumpli cu regulacion ta perde den prijs, mientras estado ta perde fondonan vital necesario pa cuido di salud, infrastructura y educacion.

E rol di propietario di condominio y bashi legal

Mayoria di e problema aki ta sucede dentro di compleho di condominio. Mientras cu e plan di desaroyo teritorial (ROPv) den hopi caso ta limita of prohibi short-term rental den areanan residencial riba tereno erfpacht (Articulonan 17.2.10 y 11), aplicacion y cumplimento ta virtualmente inexistente.

Ni esun cu ta otorga e erfpacht, ni gobierno, ta parce di actua contra violacionnan sistematico.

Den proyectonan di condominio – unda varios unidad ta ser opera hunto – e bashi legal ta explota completamente, efectivamente resultando den operacion estilo-hotel sin permiso, seguro ni inspeccion.

Ademas, hopi biaha ta bende e complehonan aki como “residencial,” mientras en realidad e intencion na momento di cumpra ta pa huur esakinan na turista. E maluso aki no solamente ta expande economia informal, sino tambe ta mina confiansa publico den e sistema legal y supervision di gobierno.

Inversionista stranhero, costo local

Mayoria di e transaccion di propiedad aki ta ser haci pa cumprador stranhero, hopi biaha cu recurso financiero substancial. Pa nan, un apartamento na Aruba ta un inversion rendabel, cu 90 te 180 dia di huur pa turista cada aña facilmente.

E ganashi en gran parti ta bay fuera di e pais y no ta contribui na economia Arubiano.

Mientras tanto, demanda pa vivienda ta aumenta, hisando prijs y pushando Arubianonan jong cada bes mas leu di mercado di vivienda.

Yamado pa accion pa gobierno y sociedad
 Sin intervencion decisivo, e situacion aki ta bay continua desaroyando den un economia paralel structural cu consecuencia socio-economico serio.

Gobierno mester urgentemente:

Aplica ley y regulacion existente (ROPv, erfpacht, permiso);

Introduci registracion y reportahe obligatorio pa short-term rental;

Reforsa supervision y inspeccion hunto cu DIMP y DOW;

Impone sancion riba huur no-registra y evasion di impuesto;

Reinverti entrada di impuesto den proyectonan di vivienda pagable pa famia local.

Economia informal como menasa contra e tehido social
 Tolerancia di e practica aki ta amplia e gap entre esnan cu ta saca ganashi di economia di turismo y esnan cu ta carga su peso: huur mas halto, congestion den trafico, deterioro di bario, y erosion di espiritu di comunidad.

Economia informal ta reforsa structuranan di labor informal, ta mina competencia husto y ta horta entrada vital for di estado.

No mester trata e asunto aki solamente como un preocupacion economico, sino tambe como un reto social y cultural.

Pa conclui, haci nada ta un escogencia silencioso pa un sociedad dividi – entre formal y informal, entre inversionista y ciudadano, entre operador y residente. Aruba por y mester haci miho.

E proximo edicion di e serie aki ta bay examina mas aleu e impacto demografico y cultural di e tendencia aki, incluyendo su efecto riba migracion y e identidad di barionan Arubiano.