Esaki no ta prome biaha cu ta bisa cu e gobierno aki tin su prioridadnan completamente robes. Mientras ta debati den parlamento tocante aumento di crimen pisa na Aruba, den otro sala di conferencia tin otro ministerio ta celebra e ‘happiness’ di e Arubiano cu mester a resulta for di un encuesta entre nos poblacion. Tremendo, casi 80% di nos ta ‘happy’, a pesar di tur e cosnan cu ta sucede den nos alrededor. Y si nos miyon di bishitante tur aña ta keda afecta positivamente cu e felicidad aki, mucho miho ainda!
Sinembargo, ta necesario pa separa un par di asunto aki. Ora ta tene e tipo di encuesta aki, y sigur si bo ta puntra pa algo ‘intangible’ manera felicidad, mayoria di hende no gusta pa nan keda categorisa como ‘infeliz’. Esaki di mes caba ta duna un desviacion den direccion di e banda positivo sin cu talbes e situacion real ta hustifica esaki. Kico cientificonan social tin como solucion pa e problema di validez aki? Nan ta inclui otro pregunta den e encuesta cu ta duna un tipo di control si realmente e persona a contesta segun cu e ta sinti, o ta contradeci su mes den e totalidad di contesta.
Nos no ta na altura di e parti aki di e investigacion haci, asina ta cu nos ta laga e tema ey sosega, bisando cu e no ta kita ni pone nada. Y pakico no? Pasobra den ‘real life’ no ta trata na prome luga di sentimento di hende. Aunke nos politiconan awor ta recuri na argumento manera “pueblo ta angustia, nan no ta sinti nan mes sigur den nan mes cas.” Esey por ta e caso, pero no ta riba esey nos mester basa nos accionnan.
Nos mester basa actuacion gubernamental riba hecho. Y e hecho ta cu tin un aumento di presencia di arma di candela y un aumento den crimen pisa tumando luga. Y e ministro concerni tambe sa toca e parti sentimental aki, bisando cu no ta crimen ta aumentando, sino ta ‘percepcion’ di hende! Hopi hende a rabia pa via di e expresion aki, cu nan rason, pasobra percepcion no ta totalmente irelevante. Nos lo bisa e ministro: “berdad, ban pone sentimento, hustifica of no, un banda un rato y ban papia business.”
Esey ta implica cu nos no kier sa solamente pakico a corta prome den presupuesto di Husticia, pa awor Abo como ministro bin bisa cu bo mester por lo menos 10 miyon mas. Nos kier sa tambe ta kico y unda a corta, y unda y kico bo kier bay reforsa den e aparato hudicial cu e dies miyon, pa nos por husga si e placa ta bon inverti y ta bay tin resultado positivo unda nan mester ta.
Por cierto nos a haya falta di e maneho racional aki den parlamento e siman aki tambe, unda hopi tempo valioso a bay perdi cu criteria y argumento cu no ta al caso. Den e sentido aki oposicion tambe tin bastante di siña, pasobra hopi biaha emocion ta tuma over y ta pusha argumento sano un banda. Asina ta, argumento a base di hecho!
Den un articulo separa den e edicion aki nos tin e cifranan di e prome mita di e aña aki, cu ta duna un bista di e cantidad di cupo di trabao na cada ministerio y e cambionan den esey. Hecho: cual ta e ministerionan cu a entrega mas cupo di trabao? Principalmente Husticia y Enseñansa! Y ken a aumenta cupo di trabao? Entre otro e Prome Ministro, cu keto bay tin un ‘corte real’ ta mantene di mas di 130 lacayo, unda aparentemente a bin un par acerca… Esey tin su ‘logica’ tambe, pasobra si Green Conference y otro show di propaganda ta prioridad, ta ey bo mester hende pa organisa. Nos por observa tambe cu na Financia, unda placa ta drenta, no tin aumento di personal, mientras por bien ta cu esey lo tabata hustifica.
Pero, ban sigui argumenta racionalmente. Nos por imagina cu e reaccion di banda di gobierno ta, cu no tur cupo di trabao ta mescos y e aumento y reduccion den cada ministerio tin su caracter specifico. “Corecto”, lo nos bisa, “anto ban papia detayenan awor, pasobra ta abo tin e informacion ey.” Bisa nos ki cupo na Husticia y Enseñansa a bay perdi pa bon motibo, y bisa nos ki tipo di cupo ta bin acerca den e ministerionan aki, pasobra nos no mester warda Stevie Wonder bin bisa nos cu tin trabao pisa pa haci den e dos ministerionan aki. Si nos djis tuma e plannan di ministro di Enseñansa pa mehoracion den enseñansa di kleuter y enseñansa basico, y e mehoracionnan cu ministro tin pensa den aparato hudicial, nos no mester di encuesta di ningun tipo pa sa cu mester inverti sustancialmente.
Ta di spera cu den e debatenan tocante presupuesto 2017 e asuntonan aki bin dilanti cu prioridad y cu nos haya sa mas cu un simpel cifra cu no ta duna di conoce kico ta bay haci. Basta di papia den misterio!
