E luna aki Cuerpo Policial di Aruba bou guia di Ministerio Publico a logra resolve 8 atraco arma. E atraconan aki a tuma luga na november y december, na januari tabatin e atraconan na La Estrella y Gembstones Jewelers. Tambe na cas di e doño di Lekker Bar y atraco riba un trahado di Sand Bar.

Relaciona cu e casonan aki, tin 9 sospechoso deteni actualmente, entre nan tin tanto Arubiano como Venezolano, kendenan a wordo deteni na december y januari. Ta sospecha cu e grupo ta encabesa pa hendenan biba na Aruba, y a actua den combinacion cada biaha diferente. Banda di esey, KPA, bao guia di Ministerio Publico, a soluciona cuatro atraco extremadamente violento na San Nicolas riba personanan di edad halto. Den e atraconan aki, cu a tuma luga na januari, un pareha grandi y dos cabayero a wordo ataca den nan casnan, y un persona grandi a wordo ataca riba caya. A uza violencia bruto. Relaciona cu e casonan aki, tin cuatro persona deteni, tur Arubianonan hoben di entre 17 y 19 aña di edad.

E investigacionnan ta ainda andando. No ta descarta cu por tin mas detencion, particularmente den e caso di e grupo di Arubiano y Venezolano.