Durante dia di ayera e mandatario encarga cu cartera di husticia, Andin Bikker (POR), e tene un conferencia di prensa na unda el a papia riba diferente punto di siguridad cu mester bay atende cu ne. E conferencia ta bin apenas dos dia despues cu aña nobo a habri, na unda Aruba a registra di biaha su prome atraco cu agresion, cual tabata riba un pareha turista procedente di Alemania. Sr. Bikker a anuncia tambe cu lo institui un organo pa conseha y mehora siguridad riba nos pais.
Durante e conferencia e mandatario a anuncia cu lo bay tuma pasonan urgente pa evita cu tipo di casonan asina tuma luga. Segun minister Bikker, semper el a vocifera desde cu e tabata den parlamento, cu mester traha planifica pa mira cu e plan ta funciona of na caminda mester ahusta e plan, specialmente di siguridad.
Segun un relato oficial di sr. Bikker, los di e incidente aki, ‘por bisa danki na creador cu tabatin sucesonan hopi limita compara cu añanan anterior’. E minister encarga cu husticia a anuncia cu lo bay tuma pasonan urgente pa evita cu tipo di casonan asina tuma luga. Manera cu Bon Dia Aruba a publica ayera, parti di e plan di e minister ta pa reenforsa cuerpo policial cu 200 persona adicional, ya cu segun sr. Bikker a bin haya un situacion den polis cu tin basta falta di recurso, y e mandatario ta impresiona cu e cuerpo ta haci su best no obstante e situacion actual.
Organo di siguridad
Departamentonan cu ta cay bou di Ministerio di Husticia lo haya tur atencion, segun un relato pa prensa di e mandatario. E relato ta sigui bisa cu ta trata di cuerpo policial, academia di polis y varios dienst cu ta cay bou di mantene orden publico y siguridad.
E minister a haci un bishita na academia di polis, di cual a tende preocupacion cu no tin uniform, no tin materialnan basico pa e polis por eherce su trabao. E parti aki, e mandatario a constata den menos di un luna cu e ta den gobierno. “Por bisa riba tur nivel den diferente departamento tin e problema aki y ta stroba pa nan por haci nan trabou debidamente.”
Mirando cu ta bay saca presupuesto 2018, pa ministerio di husticia urgentemente y diligentemente mester atende cu e falta di material, un relato di sr. Bikker ta bisa. Minister Bikker a menciona tambe, cu e siman aki lo institui un comision cu basicamente lo bay ta un organo consultativo pa loke ta trata siguridad, prevencion y combatimento di criminalidad. Por a constata cu practicamente riba tur nivel tin diferente organo cu ta duna conseho na gobierno na ministernan, y no por a constata un organo di siguridad pa ta trata e preocupacion number uno di pais Aruba cu ta aspecto di siguridad. E organo di conseho mester dedica atencion completo na formula consehonan pa mehora e siguridad y prevencion pa loke ta trata criminalidad.
Drones
Un di e puntonan di siguridad cu sr. Bikker a trece dilanti durante su conferencia di prensa ta e uzo di e asina yama drones, cual ta vehiculonan espacial cu ta wordo maneha via un control remoto. Segun e mandatario, mas pronto cu ta posibel lo bay tin un sistema di surveillance pa medio di drones den area di Oranjestad y San Nicolas, den areanan di hotspot, den area di hotelnan grandi, terminalnan di barco y otro luganan cu ta sinti cu e surveillance pa medio di drones lo bay aumenta e siguridad.
Durante campaña di eleccion ultimo, e actual parlamentario Robert Candelaria (AVP) tabata papia riba e tema aki, unda cu el a sugeri pa bin cu drone pa bula na Aruba y asina asisti e cadena hudicial. Sr. Candelaria tabata ocupa cu un proyecto di ley, unda kier reglamenta e uzo di drone na Aruba, pa asina asisti e cadena hudicial, segun un relato cu Bon Dia Aruba a ricibi. Segun e relato di sr. Candelaria, e kier bay mas aleu cu esey pa reglamenta drone, esta pa via di reglamente como deporte pa esunnan cu tin esaki manera hobby. Lo tene cuenta riba siguridad y tur aspecto necesario pa ora cu ta den e mundo di drone, pa asina tur cos bay corecto, den un manera safe y ta na beneficio di tur. “Esey aworaki mi ta tumando y buscando informacion”, asina sr. Candelaria a expresa.
Tips
Un otro sistema cu e mandatario a declara cu lo bay introduci ta e sistema di golden tips. Cu e sistema aki ta bay haci un apelacion riba e poblacion cu ora nan tin tipnan valioso, por yuda aresta esunnan cu a agredi un persona den pueblo of nos bishitantenan. Esaki por yuda tambe ora persona a falta respet na nos leynan.
E mandatario a menciona tambe cu lo kier bin cu e programa cu tanto Merca como na Hulanda tin, e asina yama opsporing verzocht, caminda atrobe ta haci apelacion y cu cooperacion di pueblo, pa ora incidentenan tuma luga, por haya tipnan valioso. E parti aki ta cay en cuadro cu e sistema di golden tips. E intencion tras di e sistema aki ta pa aresta e persona concerni mas pronto cu ta posibel, segun minister Bikker.
Mas agente policial
Manera Bon Dia a publica ayera, sr. Bikker a expresa cu lo bay sinta na mesa cu instancianan concerni pa asina intensifica e siguridad riba e isla. “Prioridad awo ta pa tuma mas agente policial den servicio. Esaki ta parti di programa di gobernacion. Unda lo pone un averahe di 200 polis adicional den cuerpo”, tabata palabranan di sr. Bikker.
Boton pa alarma y camara
Segun sr. Bikker, puntonan di benta pa loke ta Lotto pa Deporte lo haya siguridad inmediato. E minister a constata na un incidente dos siman pasa, cu un bendedo cu a ser menasa door di un persona cu un machete y logra bay cu 68 florin, e victima tabata asina spanta cu e no tabata sa ki number pa yama polis. “Esey ta haci cu lo bay institui na tur punto di benta di number, boton pa alarma.” E ayudo aki ta bay via un subsidio segun e mandatario.
E sistema aki por haci cu mesora un victima di atraco por duna un aviso na central di polis. Tambe lo percura pa bin cu sistema di camara. E mandatario a menciona cu otro siman ta bay publica un nulmeting pa wak kico tur a pasa durante Gabinete Eman I y II, pa asina por sa specificamente kico tabata e situacion. Segun e mandatario, hopi biaha na e puntonan di benta di lotto, e criminalnan ta considera e bendedonan di lotto como un obhetivo unda por enfoca riba dje. E siguridad eynan por wordo optimalisa pero e reto hopi biaha ta financiero pa e motibo aki lo bay haci uzo di fondo di combatimento di criminalidad segun minister Bikker.
“E ayudo financiero di e fondo lo percura pa tur punto di benta, nan siguridad wordo optimalisa pa asina preveni cu personanan cu menos bon intencion hinca den nan cabes pa bay molestia e luganan aki.”
Rapport Fondo Desaroyo Aruba
Den un rapport publica recientemente titula “Eindevaluatie Meerjarenprogramma’s Fondo Desaroyo Aruba”, tin cifranan cu ta indica cuanto inversion a wordo haci den proyectonan entre aña 2005 pa 2012 pa loke ta e aspecto hudicial di Aruba. Ta trata aki di un total di 305 proyecto na balor di 87,8 miyon florin.
E proyectonan tabata dirigi riba reenforsa e organisacionnan den e area hudicial, di cual ta Openbaar Ministerie (OM), Departamento di Integracion, Maneho y Admision di Stranhero (DIMAS), Aduana, Korps Politie Aruba (KPA), Veiligheidsdienst Aruba (VDA) y Financial Intelligence Unit (FIU).
Interesante di e parti aki di e rapport ta cu ta menciona cu un di e proyectonan grandi cu a inyecta placa aden ta e instalacion di camaranan di control pa yuda mantene orden publico. E camaranan aki finalmente no a bay den funcion cual pa Bon Dia Aruba ta trece cu ne basta pregunta pa e mandatario nobo di husticia.
E rapport aki ta menciona varios punto riba diferente area ,cual Bon Dia Aruba manera medio di comunicacion investigativo lo ta treciendo dilanti den e dianan binidero y lo ta tumando contacto cu tur departamento, organisacion y ministernan concerni.
