animal (3).jpg

Mientras e chens ta grandi cu lo mata e cachonan haya den e cargo di animalnan exotico haya diadomingo anochi riba un boto, husticia ainda ta investigando e destinacion final di e animalnan.

 

Wardacosta di Curaçao a detecta diadomingo anochi un boto cu nabegacion sospechoso den e awanan teritorial di Aruba. Mesora a cuminsa un investigacion y a bay haci un control rigoroso. A bordo nan a haya un gran cantidad di animal exotico: 4 yiu di papagay, un laguarundi, un ocelot, 11 tucan, dos Tamarin Monkey, tres Cocker Spaniel, un Great Dane, un Bull Terrier y 6 turtuga.

 

Tambe a haya sigaria y un cierto cantidad di gasolin. A confisca tur cos y e capitan a haya un boet pa contrabanda di producto y animal, tambe un boet como cu e boto no tabatin e documentonan cu ley ta exigi. No ta masha cla kico lo bay haci cu e animalnan. Y e investigacion penal ainda ta andando como cu mayoria di e animal ta proteha.

 

Prome biaha

Segun Irene Croes di Servicio Veterinario, transporte ilegal di bestia ta pasa mas frecuente, pero esaki ta prome biaha a logra di intercepta nan.

Segun un trahado di servicio veterinario esaki ta prome biaha cu e ta wak algo asina aki . E bestianan tabata tin set y hamber. E trahado ta bisa cu na luga di veterinario nan no tin e luga adecua pa trata e sorto di animalnan aki, ta asina cu a duna e animalnan cuminda y awe pero no ta mucho sigur unda nan lo bay.

 

‘No mata nan’

Philip Merryweather a laga sa riba su page di Facebook cu e ta cla pa tuma e animalnan aki over bou di un condicion. Na prome luga el a pidi pa no mata niun bestia. Tambe pa haci un investigacion pa wak cu tur e animalnan ta bon di salud. Y finalmente pa sterilisa e cachonan pa motibo cu Aruba tin demasiado cacho ta cana rond sin doño riba caya. Philip ta warda riba e decision cu lo tuma.