Ayera parlamento a duna prioridad den su agenda pa atende otro debate tocante e problematica di criminalidad riba nos isla. Esaki despues cu den comunidad atrobe a surgi un inkietud grandi riba e cantidad di atraco. Finalmente polis a duna cifra: 60 atraco na 2016 y den e apenas un luna y mey, e cantidad ta 14. Y un poco despues a bin e noticia cu e 15 atraco (den un cas na Sabana Basora) a tuma luga. Un punto remarcabel tambe: Venezuelonan ta responsabel pa mayoria di atraco.

Despues di hopi aña e cadena di husticia cu polis, ministerio di Husticia y Ministerio Publica tabata mas transparente, dunando finalmente cifranan riba con ta para cu e criminalidad na Aruba. Pa hopi tempo prensa, tambe Bon Dia Aruba tabata pidi mas claridad, pero bou di minister di Husticia Arthur Dowers, tabata casi imposibel pa haya cifranan. Tambe como cu polis mes y tambe Ministerio Publico a indica cu nan no por divulga nan sin instruccion di e minister aki. Mientrastanto pa hopi aña polis tin un sistema avansa, e tempo ey implementa cu placa di e Fondo Desaroyo Aruba (placa di Aruba y Hulanda), unda cu por saca hopi informacion detaya riba criminalidad na Aruba.

Ayera finalmente parlamento por scucha un presentacion di cuerpo policial (KPA) unda ta mustra cu tin un aumento di atraconan aña pasa. Y contrario cu minister Dowers a indica na 2016, unda e ta papia ainda cu mayoria ta comete pa hende local, awor ta mustra cu e situacion na nos pais bisiña di Venezuela ta afectando nos siguridad; ya cu esun cu ultimamente ta cometiendo atraco ta hendenan di afo specialmente di Venezuela cu un record criminal. Pues e modus operandi di e atracadonan y nan profiel criminal a cambia, unda e districtonan mas afecta ta San Nicolas, Noord y Santa Cruz. Igualmente a wordo treci dilanti e colaboracion di hendenan local cu ta aloha hendenan ilegal cu paspoort falso te hasta paga garantia pa nan  keda.

Oposicion
Segun fraccion di oposicion di MEP, for di 7 aña pasa e minister di Husticia ta bin anunciando un plan pa ataca criminalidad, y te ainda nan no sa nada di e plan aki. Si tin un plan, nan ta haya cu e no ta efectivo ya cu e ola di criminalidad a sigui crece y nos comunidad ta biba cu temor. Te hasta nan ta haya cu si ta na Hulanda cu un situacion asina ta presenta, gewoon e mandatario ta tuma honor y presenta su renuncia for di e gabinete. E presentacion aki a haci cu entre nan, parlamentario Xiomara Maduro di MEP a bin cu un serie di pregunta, entre nan riba e trabou cu nos organismo di inteligencia mester realisa. Te hasta e ta haya cu nos organismo di inteligencia mester alerta nos autoridad competente riba hendenan cu ta comete acto di ilegalidad haciendo uzo di e manglonan y e infrastructura di e dump di Parkietenbos cu ta pega cu e waf di Barcadera. Otro echo cu e parlamentario Maduro a cuestiona y cu supuestamente nos organismo di inteligencia mester alerta gobierno tin di haber cu e operacion di e waf a wordo otorga na un compania priva, caminda cuerpo di Aduana su autoridad a wordo mengua.

E pregunta di oposicion riba asunto di criminalidad tabata di diferente indole, entre nan e falta di un helicopter cu lo por duna sosten na Polis; te hasta a wordo menciona un biaha mas e relacion di Kico Gomez, ex Gobernador di Guajira condena na 55 aña di prizon na Colombia y di Ricon cu gobierno, caminda un biaha mas parlamentario Maduro ta haya cu trabou di inteligencia na Aruba a faya.

ESTA
E necesidad di traha mas estrechamente cu partnernan di reino den nos region. Pero tambe e situacion di nos hende local cu a cay den criminalidad, con e asunto aki ta wordo trata socialmente pa gobierno y e proyecto di e camara di siguridad cu ainda no a wordo ehecuta totalmente, a wordo cuestiona tambe.  Un punto cu e parlamentario di oposicion a haya bon ta e anuncio cu lo wordo introduci un sistema di ESTA (Electronic System For Travel Authorization)  pa bin cu mas control riba e hendenan cu ta bin di afo, specialmente di Venezuela.

Comentario di minister
Den entrevista cu Bon Dia Aruba, minister di Husticia Dowers ta declara cu nan ta hibando un lucha continuo contra criminalidad. Tambe el a laga cu no ta asina cu bo por eradica crimen completamente. Den e caso di nos pais, e ta haya cu un isla chikito manera esun di nos cu poco medio cu nos tin ta librando un lucha contra hendenan robes di e pais bisiña di Venezuela, y nos autoridad ta haciendo un trabou duro. E mandatario a bisa cu nan ta trahando riba e parti di bin cu ESTA, manera esun pidi na Merca cu ta permiti di antemano sa kende ta esun cu ta biniendo.

Mirando e caracteristica di e antisocial cu a wordo deteni recientemente, minister Dowers ta bisa cu nan ta sosteniendo combersacion cu autoridad Venezolano. Pero e ta admiti cu pa motibo di e sistema nobo cu ta goberna e pais ey, masha poco tin combersacion entre husticia di Aruba y Venezuela. A pesar di e situacion aki, nan lo bay haci intento y esfuerso riba e tereno di husticia entre ambos pais. E trabou di tur seccion di polis a aumenta y tambe di Wardacosta cu a bira 24-7, pero el a haci un yamada na comunidad pa yuda reduci criminalidad.

Traficacion di hende
Minister Dowers ta anuncia tambe e introduccion di e team special “mensenhandel”, esta contra traficacion di hende cu ta bay atende cu tur persona cu ta sostene e kedamento di persona ilegal, sea pa nan traha ilegalmente of keda na bo cas, y despues ta bay comete atraco. “Tur hende cu ta facilita un ilegal pa yega na medio pa permanece na pais Aruba ta core e risico di wordo persigui den futuro.” P’esey e ta haci e advertencia aki pa tur hende cu ta cooperando cu e hendenan ilegal, ya cu e ta den pugna cu nos codigo penal, ya cu nan por wordo persigui y cera cu e delincuentenan. E ta bisa cu na nivel di reino, Aruba ta trahando hunto cu Corsou pa wak con hunto nos por yega na mas radar pa aumenta e efectividad di Warda Nos Costa. Encuanto e proyecto di camara, minister Dowers a bisa cu e proyecto ta cla, pero pronto den e luna aki lo wordo inaugura pa asina tur hende por haya splicacion amplio di e proyecto aki.

‘200 miyon presupuesta’
Encuanto e critica formula riba criminalidad, e mandatario a declara cu “nos tur tin critica riba criminalidad. No ta asina ey cu nos ta pro criminalidad” Den e lucha aki gobierno a pone un presupuesto di mas cu 200 miyon florin riba tereno di husticia. Sinembargo e ta haya cu oposicion no ta critica criminalidad, sino cu ta critica e minister, polis y otro instancianan manera OM,  “pero nan no ta critica niun crimen”. E minister ta expresa finalmente cu a pesar di e critica riba criminalidad, Aruba ta keda un pais safe.