IMSI Catchers of International Mobile Subscriber Identity-Catcher ta un instrumento cu Seguridad Nacional Arubano y Cuerpo Policial di Aruba ta dispone di dje, e dispositivo aki ta aparenta un toren di celular (A man in the middle , MITM) caminda cu e ta intercepta tur señal di telefon den bisindario.

Nan ta yame IMSI Catcher pa motibo cu nan ta intercepta y warda codigonan IMSI cu ta un identificador asocia na e chip di telefon y na e number di telefon, esaki ta permiti na (A man in the middle) MITM, (Cuerpo Policial di Aruba of Seguridad Nacional) conoce e ubicacion mas cerca di un persona di interes of un sospechoso y haya acceso na mensahenan di texto SMS y yamada, loke ta mas interesante ta cu un bes cu Cuerpo Policial of Seguridad Nacional ta persigui un ‘target’ IMSI Catcher no ta colecta solamente SMS, yamada of datonan di un target specifico, e ta colecta tambe SMS y informacion di tur celular cu ta conecta na IMSI Catcher na e momento ey.

En general, e dispositivo aki tin dos manera pa funciona cu ta activo of pasivo, den e manera activo IMSI Catcher ta forsa e telefonnan cercano pa conecta na e IMSI Catcher specifico, pa intercepta combersacionnan y mensahenan, esaki ta esun mas tradicional.

Esun pasivo ta wak e comportamento di e telefonnan den bisindario, ta menos precies y nan no por realisa ningun tipo di interceptacion sofistica, esaki no ta implica interaccion entre e dispositivo mobil y IMSI Catcher.

Den un di e investigacionnan cu Seguridad Nacional di Aruba, a haci uso di IMSI Catcher, cu ta encera un investigacion di Algemene Inlichtingen- en Veiligheidsdienst (AIVD) di Hulanda pero riba teritorio Arubano cu cooperacion completo di Seguridad Nacional di Aruba y Gobierno di Aruba.

E investigacion aki a tuma luga na un luga specifico durante un periodo di mas o menos un ora y mey, pa e accion ey, segun e entrevistanan haci, a resulta cu a duna permiso verbal door di e hefe y e ministernan concerni.

Pa pone e resultadonan di AIVD disponibel, e minister di Asuntonan General den nombernan di ministernan concerni a otorga un permiso por escrito, manera articulo 11 lid1 di Landsverordening VDA ta exigi.

Un fuente a informa Bon Dia Aruba cu “si Cuerpo Policial of Seguridad Nacional usa un IMSI Catcher miho conoci como Stingray cerca di un edificio gubernamental, IMSI Catcher lo por intercepta datonan di tur e persona cu ta traha den edificio ey, incluyendo posiblemente politiconan, ministernan, parlamentarionan of funcionarionan di nivel halto, e datonan lo por wordo utilisa di manera no debido”.

Un dato interesante cu Bon Dia Aruba a haci investigacion riba dje ta cu IMSI Catcher ta specificamente dirigi pa por intercepta SMS, yamada di telefon, entre otro datonan, por intercepta yamada cu ta wordo haci via Whatsapp, Telegram, Signal, etc. Pero, no por scucha (Aftappen) y no por descifra nan, pa motibo cu e tres aplicacion specifico aki tin ‘End to End Encryption’, den caso di Facebook Messenger, si por intercepta y lesa e mensahenan di e aplicacion aki.

Den documentonan di Corte por mira hopi conversacion di e aplicacion Whatsapp cu ta sali, pero nan ta conversacion cu ta skirbi cu mayoria di sospechosonan ta laga den nan telefon of nan ta purba delete nan y na final e ta keda den e back up.

Segun conclusionnan di e comision van toezicht betreffende de veiligheidsdienst Aruba, e investigacion a mustra cu den e periodo di investigacion cu tabatin (Aftappen) intervencion di linea di telefon, observacion, siguimento, accion di agente y uso di IMSI Catcher.

Intervencion di linea di telefon tabata wordo investiga prome caba pa e comision, e recomendacionnan na e momento ey a wordo tuma over, segun e comision no tabatin ilegalidad durante e parti di Aftappen.

Riba e imagennan referencial Bon Dia Aruba ta ilustra con IMSI Catcher ta traha.