(EFE) – Dialuna ultimo un hues Colombiano a ordena cu e ex-hefe paramilitar Salvatore Mancuso, ex-comandante di Autodefensas Unidad de Colombia (AUC) ta bay haya su libertad pa un periodo di “prueba” di cuatro aña.
“Ta bay concede na Salvatore Mancuso Gomez e libertad di un periodo di cuatro aña di prueba,” hues Luz Marina Zamora a sigura den audiencia na hurisdiccion special Husticia y Paz den cual mester a defini si e ex-hefe paramilitar ta bay keda den libertad.
Mancuso, ken presidente Gustavo Petro a cualifica como “gestor di paz” pa ta mediador cu Clan del Golfo, grupo heredero di AUC cu cual gobierno a cuminsa algun dialogonan “frustra,” diamars di siman pasa a yega na Bogota for di Merca, despues di un proceso di deportacion y despues di a cumpli un condena pa narcotrafico.
A investiga Mancuso na Colombia pa mas di 75.000 crimen, pa loke su deportacion na e pais tabata den “stand by” casi cuatro aña debi na pandemia di Covid-19 despues di a cumpli su condena na 2020.
E ex-hefe paramilitar ken ta cera na prison La Picota di Bogota, a keda na disposicion di e hues di ehecucion di sentencianan di Husticia y Paz ken a cit’e den un audiencia cu a cuminsa diabierna siman pasa y a caba dialuna ultimo, asina como magistrado di control di garantia di Barranquilla, cu ta e autoridadnan competente pa tuma decisionnan tocante Mancuso su libertad.
Den sentido aki, e hues a sigura cu su salida ta bay depende si otro autoridadnan no lo solicita Macuso den futuro, pa e motibo ey, ex-comandante di AUC ta bay permanece den prison tanten e salanan di Husticia y Paz di Barranquilla y Bogota ken lo dicidi su suerte.
