Katherine Haringhton Padrón a wordo nombra pa Tribunal Supremo di Husticia como e vice-fiscal nobo di Venezuela. Den e acto di nombramento no tabata presente e fiscal general, Luisa Ortega Diaz, ni miembronan di Asamblea Nacional.

E vice-fiscal nobo a keda huramenta sin autorisacion di Asamblea Nacional, pasobra e organo aki no ta di acuerdo cu e nombramento. Tribunal Supremo di Husticia a hustifica nan decision, pasobra nan ta bisa cu parlamento Venezolano ta den un situacion di “desacato”. E calificacion di desacato tin origen den eleccion parlamentario di aña 2015, caminda nan a incorpora den poder legislativo tres diputado indigena cu segun e tribunal di husticia no a haya voto suficiente pa gana eleccion.

Diamars e alrededornan di TSJ a manece vigila pa efectivo di Guardia Nacional Bolivariano. Ortega a bira un voz fuerte contra presidente Maduro, y awor e tin apoyo di e grupo di oposicion y di chavista cu no ta diacuerdo cu presidente Maduro. Ortega den un discurso a responsabilisa Maduro di kibra e orden constitucional, cu decisionnan cu Tribunal Supremo di Husticia a tuma contra poder legislativo. “Mi no lo tuma descanso te dia cu Venezuela por haya e caminda di libertad atrobe,” Ortega a priminti den un mensahe na Venezuela.

Luisa Ortega a dicidi pa no bay dilanti di Tribunal. Supremo di Husticia Tribunal supremo di husticia tabatin planea un huicio pa ayera contra  Fiscal General Luisa Ortega Diaz, cu obhetivo di dicidi si nan por cuminsa un proceso di destitucion contra Ortega. Finalmente huicio  no a tuma lugar pasobra e Fiscal General no a bay y el a introduci un recurso hudicial, pa evita participacion den e huicio di  17 magistrado cu ta envolvi den e causa legal aki.

“TSJ lo tuma un decision cu lo ta un violacion mas, cu obhetivo di anula e ultimo institucion cu por defende persona y manifestantenan. Pesey mi no a bay, mi no ta bay participa den un circo, cu lo mancha nos historia cu berguensa y dolor, pasobra e decision ta conoci caba,” Ortega a bisa. “Desde awe lo cuminsa mi retiro, por ta pa mi of por ta pa e vice-fiscal Rafael González Arias.” Fiscal Ortega a desconoce e nombramiento di TSJ di abogada chavista Katherine Harrington, como vice-fiscal nobo. Harrington lo por substitui Ortega si TSJ logra su destitucion.

E audiencia den TSJ a cuminsa sin presencia di Ortega Diaz. Den e audiencia tabata diputado Pedro Carreño , cu ta esun cu a solicita  “ante huicio di merito” contra Ortega.