“Corte den Prome Instancia na Corsou a duna un veredicto den e caso ENNIA versus e firmante, representando un eror mayor di husticia den tur sentido di e palabra. E sentencia di Corte no a tene cuenta cu evidencia extenso cu claramente ta mustra cu ningun di e acusacionnan ta valido”, ex-presidente di ENNIA, Hushang Ansary a bisa den un comunicado di prensa.
E comunicado ta un reaccion na e veredicto di Corte cu a duna orden pa Ansary paga mas di un biyon florin na ENNIA y su aseguradonan.
“Ta mi creencia cu e veredicto aki pa largo ta bay sirbi como un caso extraordinario ehemplar na Merca y otro lugarnan den e nacionnan avansa como un advertencia contra e peligronan di inversion sin importa con exitoso y bon intenciona, den cualkier pais cu legislacion cu ta permiti confisca propiedad priva sin derecho di apelacion. E lo ta un caso ehemplar pasobra, di un banda, ta representa añanan di aprobacion anual di declaracionnan financiero di companianan di seguro ENNIA na man di Banco Central di Corsou y Sint Maarten, y di otro banda, e reversion completo di e aprobacionnan aki na man di e mesun Banco Central mas cu un decada despues.
“E reversion aki a sigui na juli 2018 cu e takeover inapropia di activonan priva significante di ciudadanonan Mericano cu di ningun manera tabata suheto na e ley di seguro. Igualmente importante, na momento di confisca, e companianan di seguro ENNIA tabatin e miho relacionnan cu nan aseguradonan, no tabatin acreedornan tercero ni reclamonan otro cu den curso ordinario di negoshi, cu cash, ekivalentenan di cash y otro activonan valioso enormemente den exceso di nan necesidadnan a termino corto y largo.
“Lamentablemente, na e momento aki, ta parce cu a malgasta cantidad di miyones y mester duna cuenta pa esaki. E inversionistanan Mericano ta bay tuma tur accion necesario pa protege nan derechonan y propiedad”
El a firma su carta como Hushang Ansary, ex-Presidente, ENNIA Caribe Holding N.V.
Riba potret: Hushang Ansary.
