ORANJESTAD – Ayera a yega na General Aviation Terminal di Aruba pa 12:04 minuut di merdia e avion Hurricane Hunters Hercules for di Merca como parti di un tour cu nan ta haci riba horcan den Caribe hunto cu varios cientifico y tripulacion di e avion, pa via cu e temporada di horcan 2019 ta cercando y hopi biaha e islanan di Caribe ta haya problema cu horcan.

Minister di Comunicacion, Transporte y Sector Primario, Chris Romero a splica cu e obhetivo ta pa alerta riba e impactonan di ciclonnan tropical y e peliger di ta den un calamidad sin tin un plan personal di horcan y ta prepara pa e mal tempo.

Desde e momento cu e temporada di horcan a cuminsa na juni, ayera a toca turno pa Aruba pa ricibi di e avion aki cu su tripulacion den aeropuerto. E avion Hercules ta un di e dies avionnan cu ta wordo usa pa reservista di e forsa aereo Mericano. Durante horcan, e avion militar aki di ultimo generacion ta wordo guia strategicamente pa drenta den e ciclonnan tropical, pa asina recopila datonan critico y di suma importancia pa pronostica e intensidad y embergadura di e horcan.

Romero a manifesta cu e datonan ta wordo manda na tempo real via satelite for di avionnan directamente pa e centro nacional di horcan, pa asina duna un analisis y uso di parti di experto den areanan di horcan pa prepara cu anticipacion cu ta importante pa tur hende y mas precisamente pa esunnan cu mester tuma decisionnan clave.

Tambe Romero a menciona cu ta importante pa conoce e riesgonan y e peligernan specifico di tur horcan. E bishita ta duna Aruba e oportunidad di siña y compronde con cientificonan ta recopila tur informacionnan di horcan, y con nan ta manda esaki den tempo real via satelite for di avion directo pa e centro nacional di horcan.

Na aeropuerto tambe tabata presente e minister di transporte di Corsou, Zita Jesus-Leito, ken a manifesta cu na prome luga, esaki ta un cooperacion cu nan tin cu Aruba, pa motibo cu e ta kere cu si e islanan tambe ta hunto riba asuntonan cu ta den beneficio di pueblo di Corsou y Aruba.

“Un avion asina aki ta di vital importancia pa asina nos por compronde e fenomenonan, manera horcan, mas di cerca”, Leito a sigura.