Hurista legislativo Carlos Guiamo: “Pa habri derecho di voto den exterior, mester haciel’e den un forma responsabel”

For di basta tempo caba, e topico tocante Arubianonan bibando den exterior cu kier vota ta permanece vooral na momento di eleccion unda cu te awor, esey no ta posibel. Pa esaki, Bon Dia Aruba a tene un entrevista cu Carlos Guiamo ken a duna su splicacion di e tema aki.

Carlos Guiamo ta un candidato di RAIZ, hurista legislativo (wetgevingsjurist) y consehero na Ministerio di Transporte, Integridad, Naturalesa y Asunto di Adulto Mayor unda cu door di su experticio e ta duna informacion na cierto topiconan relevante pa comunidad.

Ta conoci cu actualmente Arubianonan cu ta biba den exterior no por vota y e no ta bay ta posibel tampoco pa eleccion di dia 6 di december, pero e si ta kere cu si ta bon pa haci esaki posibel pa un proximo eleccion “y e pensamento cu a mi y Raiz tin riba esaki, ta cu nos kier nos studiantenan pa vota. Aruba ta un pais cu tur aña ta manda relativamente hopi studiante afo y nos kier nan bin back y conecta cu nos pais tambe. Hopi di nan ta sigui politica di Aruba, tur aña bo ta wak nan ta back na Aruba tambe, nan ta bin di vakantie y bin wak nan famia, dunando nan e derecho di voto, bo ta duna nan algo di influencia pa wak con nan pais ta sigui forma,” el a expresa.

Pero, tin puntonan pa tene na cuenta pa habri derecho di voto den exterior y mester haciel’e den un forma responsabel, na momento cu mester analisa di cuanto hende ta papiando. Tin hopi pais cu ta permiti hendenan di nan pais den exterior vota, pero “hopi biaha bo lo ripara cu ta un porcentahe relativamente chikito di esun cu ta biba na e pais ey, pasobra hopi hende lo bisa bo tin cu biba e consecuencia di bo voto.”

Tin caso di famia Arubiano cu tin mas cu 30 aña ta bibando na Hulanda, algun di nan ta bisa cu nan lo no bin back, e ora e pregunta ta bin dilanti: pakico laga nan vota? Sinembargo, tin e grupo di studiante “eynan si nos por bisa por ehemplo, tur esnan cu tin no mas cu 6 aña afo di Aruba nan tin derecho. Esey ta un manera cu nos por regl’e legalmente y ya caba bo a haci e grupo mas chikito, ba concentr’e riba studiantenan y riba esnan cu tin chens mas grandi di bin back,” Guiamo ta señala.

Den su opinion, mester haya sa di cuanto hende ta trata pa motibo cu asina por midi e impacto riba electorado, por ehemplo, kisas na Hulanda nan ta permiti pa Hulandesnan cu ta biba pa por lo menos 10 aña na otro caminda, nan por vota “pero e ta un parti hopi chikito di nan electorado. Na Hulanda so tin miles di Arubiano ta biba y tambe na otro partinan di mundo, mi no ta kere cu ta deseabel pa di repente 7 asiento ta pafo di Aruba pasobra esey tampoco no ta e intencion, pero si nos kier busca e miho forma pa concentra riba primordialmente studiantenan cu ta bay pa progresa y bin back pa contribui na Aruba,” el a bisa.

Pa haci esaki posibel, leynan electoral ta cay bou e minister di Asuntonan General cu ta prome minister y Parlamento di Aruba mester ta di acuerdo pa esaki, aparte di e ley mester tambe pensa riba con ehecuta un ley “pasobra un ley su so nunca no ta e meta, e ta djis un instrumento pa logra e meta. Si nos logra cu tin un ley asina, tin cu pensa riba con ta ehecut’e.”

El a sigui splica cu Aruba no tin embahada na tur pais rond mundo y tampoco ta usa votacion digital ni riba carta, e ora tin cu pensa riba practica con ta bay permiti studiantenan of esnan di afo pa vota di un manera responsabel “cu nos tur ta confia cu e votacion y pensa inverti den tecnologia. Hulanda tin Arubahuis y nos tin un cooperacion den Reino, mi ta imagina cu den Reino nos tin e modo di haci votacionnan di un manera con bon control y mi ta keda enfatisa cu e mester ta un sistema confiabel si,” el a sigura.

Segun Guiamo, tin hopi hende interesa den e tema aki na e momentonan aki. Tin Arubianonan den exterior ta puntra over esaki “mi sa cu tin un interes for di hopi tempo, mi sa cu diferente partidonan ta sigui papia di esaki pero nunca no a materialisa. Mi ta spera cu despues di eleccion aki si nos tin un parlamento nobo y suficiente sosten di mas partidonan y pa nos duna e prioridad pa e bira un realidad.”

Pa loke ta trata eleccion, Guiamo a enfatisa cu nan lo traha duro den e campaña aki pa logra un bon resultado y cu nan lo pusha esaki.

Pa finalisa, el a declara cu influencia democratico no ta limita na un voto cada tanto aña “un di e proyectonan cu mi mes a pusha ta pa haci consultanan publico. Si bo subi riba e website www.publico.aw tin un pagina di consulta unda nos a cuminsa pone e leynan of preguntanan di maneho cu tur hende por duna nan opinion riba dje y gobierno por tene na cuenta cu esey. Esaki nos ta lag’e habri pa esnan den exterior tambe, ta un manera pa keda tin influencia di con bo pais ta desaroya. A mi ta kere cu influencia den ciudadano no ta caba ora vota, esey ta e custumber na Aruba. Tur hende ta haya atencion tempo di campaña, vota y despues nada. Tante cu nos mester di un democracia mas participativo y nos tin cu cambia e sistema cu prome cu gobierno tuma decisionnan, pueblo por a duna su punto di bista riba dje.”