E proyecto Hunto Grandi, Grandi Hunto ta un proyecto cu tin como meta yuda adultonan mayor, 60+, ta mas activo den diferente area di nan bida. Sra. Rosa Leon, Toegepast Gerontoloog y lider di e proyecto ta conta di nan programanan mas recien, Aquafitness cu ta wordo organisa conhuntamente cu Fundacion Movemento ta Bida y Aqua Windie’s Aruba.

Leon a splica cu e proyecto Hunto Grandi, Grandi Hunto conhuntamente cu Fundacion Movemento ta Bida a acerca Aqua Windie’s Aruba pa asina ofrece dos programa cu Aquafitness, ehercicio den awa, esta Aquafit y Aquacicle, cu lo cuminsa entrante otro siman.

Aquafit, segun Leon a splica den un entrevista cu Bon Dia Aruba, ta aerobic pero ariba un ritmo mas suave y den awa, cual lo tuma luga ariba diahuebs di 10or pa 11or di mainta. Ariba diasabra, di 4or pa 5or di atardi, nan lo ta ofreciendo e programa Aquacycle cu por wordo mira manera un les di spinning ariba un ritmo mas suave tambe y den awa.

“Tur dos ta den awa y esaki ta pa molestia menos e rudia, e lomba, e curpa cu hopi di nos grandinan tin problema di dje y nan no sa haci hopi sport door di esey”, Leon a indica.

E programa Aquafitness tabata existi caba, pues Aqua Windie’s mes ta ofrece e programanan aki, pero hopi adultonan grandi no tabata sa di dje, Leon a indica. El a sigui conta cu den un combersacion cu un di e instructornan, Brigitte Boekhoudt, di e programa Aquafit, el a comenta cu e kier organisa proyectonan innovativo e aña aki pa e hendenan grandi.

“El a bisa mi nos por join nan pa cu esey pasobra nan no tin mucho adulto mayor pa cu e programanan aki. Normal nan ta hayando hendenan di edad jong, pero e grupo di hende grandi nan no ta haya”, Leon a agrega.

Cada ciclo di e lesnan, Leon a sigui splica, ta dura 12 siman y despues di esey e personanan cu a gusta e les por sigui tuma e siguiente ciclonan di e programa. E diferencia entre e ciclo aki, cu lo cuminsa entrante otro siman, cu e siguiente ciclonan ta cu unicamente pa e ciclo aki e participantenan lo ricibi e lesnan na un prijs di promocion, Leon a splica, door cu nan kier incentiva e adultonan mayor pa participa.

E proyecto Hunto Grandi, Grandi Hunto ta un proyecto di Cede Aruba unda cu e meta principal pa trece e adultonan di 60 aña bay ariba mas activo den sociedad y busca wak cual ta e necesidadnan cu ta tin eyfo. Cede Aruba a acerca Fundacion Movemento ta Bida, door cu e fundacion tin diferente gruponan di 60+ activo rond di Aruba.

Den un entrevista cu medio local TeleAruba, Leon a remarca cu movecion ta importante, no solamente pa hende grandi pero pa tur hende y mientras mas grandi un hende bira mas dificultad nan ta encontra pa move, “pero una bes bo keda den movecion esey ta yuda minimalisa tur dolor cu bo por tin”, el a agrega.

El a subraya cu tin interes di e hendenan grandi, 60+, pa haci movecion y vooral ora cu ta trata di proyectonan nobo, nan ta mas curioso y esey ta locual cu Hunto Grandi, Gandi Hunto kier crea, curiosidad entre nan pa nan participa den e proyecto.

Pa loke ta trata e tema di vergrijzing rapido na Aruba, pregunta cu el a ricibi for di miembro di prensa, Leon a indica cu Fundacion Movemento ta na Bida tambe ta na altura cu e populacion di adultonan grandi ta creciendo rapidamente. El a splica cu e meta di cada un di cada programanan di e fundacion ta pa motiva otro instancianan tambe pa uni den e mesun causa.

“Si nos tur traha hunto nos ta crea un actividad rond full Aruba y no enfoca solamente riba un fundacion. Esey ta e enfoke principal cu nos tin, pa traha tur hunto, tur cu tin como meta e adulto mayor ban traha hunto. Si nos ta ofrece, San Nicolas tambe por ofrece, Savaneta etc. pa nos trece e motivacion pa otro instancianan tambe mirando e cantidad di adulto mayor cu nos ta mirando aworaki”, Leon a remarca.

El a sigui splica cu Fundacion Movemento ta Bida ta activo den seis diferente bario unda cu cada bario ta independiente y nan ta apoya nan pa cu esey. Nan ta incentiva e barionan of e gruponan cu no ta activo pa acudi na e fundacion pa ricibi e ayudo y informacion con pa lanta un grupo, cu tambe ta un di e metanan cu nan tin como fundacion. “Si bo tin un grupo di 10 adulto mayor y bo kier ta activo, pero bo no sa con pa hacie pasa cerca nos na oficina y nos lo duna tur e indicacion con pa haci esaki”, el a agrega.

Por ultimo Leon a informa cu den transcurso di aña nan lo tin e famoso programa di Desaroyo Continuo y Digital cu ta pa esnan cu no sa traha cu nan smartphone. “Mi ta conseha tur persona sigui e pagina di Facebook di Fundacion Movemento ta Bida y ey riba por encontra tur informacion ariba tur e programanan cu lo tin durante aña”, el a finalisa.