(AP)—Hunter Biden a puntra e embahador di Merca pa Italia pa ayudo relaciona na un proyecto di energia cu un compania di gas Ucraniano tabata persiguiendo mientras su tata tabata vice presidente, segun The New York Times.
Hunter Biden, yiu homber di presidente Mericano Joe Biden, a skirbi un carta pa e embahador na 2016 buscando asistencia pa Burisma, cual tabata trahando riba un proyecto geotermal na Italia, segun e corant a reporta, citando historia- y entrevistanan recien publica.
E tempo ey, Hunter Biden tabata parti di e directiva di Burisma, cual tabata experenciando dificultad pa obtene aprobacion regulatorio pa e proyecto, segun un empresario envolvi den e proyecto a conta e corant.
E revelacion lo probablemente stimula critica for di e banda Republicano riba e negociacionnan den exterior di Hunter Biden, cual ta e punto principal di investigacionnan Republicano den e famia di e presidente. E rapport ta bin algun siman prome cu Hunter Biden mester para huicio riba cargonan federal acusando cu el a fracasa pa paga impueto riba placa cu el a ricibi for di Bursima y otro negoshinan stranhero.
Fiscalnan a indica siman pasa den documentonan di corte cu nan kier introduci evidencia tocante e otro negociacionnan di Hunter, incluyendo un areglo cu un negociante Romano cu tabata purba “influencia politica di gobierno Mericano” durante Joe Biden su termino como vice presidente.
E abogadonan di Hunter Biden a bisa cu e acercamento di su cliente na e embahador den nomber di Burisma tabata un “peticion adecua” y cu el a puntra “varios hende” pa yuda regla un introduccion entre Burisma y e presidente di e region Tuscany di Italia.
“Ningun reunion a tuma luga, ningun proyecto a materialisa, no a busca ningun peticion pa cualkier cos na Merca y solamente a pidi pa un introduccion na Italia,” segun e abogado Abbe Lowell a bisa. E historia ta sugeri cu oficialnan di embahada tabata dudoso tocante e peticion di Hunter Biden, segun e corant. Un oficial a skirbi: “Mi kier ta cuidadoso tocante primintiendo demasiado.”
Un vocero di e White House a conta The Times cu e presidente no tabata consciente ora e tabata vice presidente cu su yiu homber a acerca e embahada den nomber di Burisma. “E no ta den negoshi cu si yiu,” segun secretaria di prensa di e White House Karine Jean-Pierre a bisa ayera di e presidente. “E sigur no ta consciente di esaki y esaki ta algo cu Hunter Biden mester atende cune. E ta un ciudadano priva, e ta algo pa e enfoca riba dje.”
Ora a puntra si Biden tabata satisfecho cu con su yiu homber a conduci su mes, Jean-Pierre a conta reporteronan: “Mi no por papia riba esaki. Esaki ta algo cu ta un proceso andante.”
John R. Phillips, e embahador Mericano pa Italia e tempo ey, a bisa cu el a ricibi hopi carta y no a corda Hunter Biden acercando e. “Sigur lo mi a pone atencion riba dje” si Hunter a tuma contacto cune, segun Phillips a conta e corant.
E proyecto di Burisma nunca a materialisa, y no ta claro si e embahada a acorda mes pa yuda e compania.
E huicio di Hunter Biden ta plania pa cuminsa na Los Angeles otro luna alegando un skema di cuatro aña pa scapa pagamento di al menos 1.4 miyon dollar den impuesto durante un tempo den cual e yiu homber di e presidente a reconoce su lucha cu adiccion di droga.
E abogadonan di Hunter Biden a indica cu nan lo argumenta den huicio cu uso di droga a afecta su capacidad pa tuma decisionnan asina malo cu e “no por a forma e intento rekeri pa cometi e crimennan di cual el a cargo di dje.”
El a ser condena di tres cargo di delito den un caso separa acusando cu el a gaña riba un documento di compra na 2018 por medio di bisa cu e no tabata usando of no tabata adicto na droga. E por enfrenta te cu 25 aña den prizon, pero como un ofensor di prome biaha, e lo probablemente haya menos tempo of scapa prizon completamente.
