(AP)—Hunter Biden a ser condena ayera di tur tres carga di delito relaciona na e compra di un revolver na 2018 ora, segun fiscalnan a argumenta, e yiu homber di e presidente Mericano a gaña riba un formulario obligatorio pa cumpra arma bisando cu e no tabata usando of no tabata adicto na droga.
Presidente Joe Biden a bisa den un declaracion publica despues di e veredicto cu e lo acepta e resultado y “sigui respeta e proceso hudicial mientras Hunter ta considera un apelacion.” Awo Hunter Biden y nominado presidencial republicano, Donald trump, ambos a ser condena pa huradonan Mericano den un aña di eleccion cu tabata trata di ambos e huicionan criminal como eventonan di campaña.
Hunter Biden ta enfrenta te cu 25 aña den prizon ora e haya sentencia di hues di districto Maryellen Noreika, aunke como un ofensor di prome biaha e no lo haya e maximo, y no tin garantia cu e hues lo mand’e prizon. E no ta plania un fecha di sentencia ainda.
Abogado di defensa Abbe Lowell a bisa cu nan lo “sigui persigui tur desafio legal disponible.” Den un declaracion escrito, Hunter Biden a bisa cu e tabata desapunta pa e resultado pero ta agradecido pa e apoyo di su famia y amigonan.
Joe Biden a mantene distancia for di e corte federal na Delaware unda e huicio a tuma luga y a no a conta hopi tocante e caso, cuidadoso pa no aparece como interveniendo den un asunto criminal treci dilanti pa su mesun departamento di Husticia. Pero aliadonan di e democrato a preocupa tocante e consecuencianan cu e huicio—y awo e conviccion—lo tin riba e presidente di 81 aña, ken ya tin tempo preocupa tocante e salud di su unico yiu homber na bida y su sobriedad.
E conviccion di Hunter Biden a bin algun siman despues cu Trump a ser haya culpable di 34 carga di delito relaciona na un pago di silencio na un actor pornografico durante e campaña di 2016. E casonan no ta relaciona cu otro, y Hunter Biden ta un ciudadano priva cu no ta den e careda pa e oficina presidencial. Pero ambos a argumenta cu nan a cay victima pa e politica di e tempo.
Sinembargo, Trump a sigui declara falsamente cu su veredicto tabata “manipula”, mientras cu Joe Biden a bisa e lo acepta e veredicto envolviendo su yiu homber y no lo busca pa dun’e pordon federal.
E campaña di Trump a yama e veredicto di Biden “nada mas como un distraccion for di e crimennan real di e Famia Criminal Biden.” Trump y su aliadonan a tira acusacionnan no substancia of proba falso cu Joe Biden a actua den su rol como vice-presidente pa avansa e interes empresario di su famia.
E veredicto a bin mientras e presidente a prepara pa duna un discurso na un conferencia organisa pa e Everytown for Gun Safety Action Fund na Washington. E no a menciona su yiu homber mientras el a papia tocante e esfuersonan di su administracion pa stop violencia di arma y e necesidad pa prohibi armanan di asalto.
Huradonan a haya Hunter Biden culpable di gaña un bendedo di arma licencia, haciendo declaracionnan falso riba e aplicacion por medio di bisa cu e no tabata usa droga y cu e no tabatin un arma ilegalmente pa diesun dia.
E procedemento ta pone atencion riba un tempo scur den e bida di Hunter Biden, cu testimonio personal for di ex-partnernan romantico y evidencia berguensa, incluyendo mensahenan y potretnan di Hunter Biden cu paraphernalia di droga of parcialmente bisti.
Den su argumento di ciere dialuna, fiscal Leo Wise a reconoce cu e evidencia tabata “mahos.” Pero el a conta huradonan cu e tabata “absolutamente necesario” pa prueba cu Hunter tabata adicto ora el a cumpra e arma y p’esey a gaña ora el a marca ‘no’ riba e formulario cu a puntra si e tabata “un usuario ilegal of, adicto na” droga.
E abogadonan di Hunter Biden a argumenta cu e no tabata considera su mes como un “adicto” ora el a cumpra e revolver. Nan a busca pa mustra cu e tabata cambiando su bida e tempo ey, mirando cu el a completa un programa di rehabilitacion fin di augustus 2018.
E problemanan legal di Hunter Biden no a caba. E ta enfrenta un huicio na september na California riba carganan di fracasa pa paga 1.4 miyon dollar den impuesto, y republicanonan congresional a señala cu nan lo keda persigui’e den nan esfuerso pa destitui e presidente for di oficina. E presidente mes no a ser acusa of no a haya carga di cualkier acto criminal pa fiscalnan investigando su yiu homber.
