E Hunta di Supervision nobo cu lo maneha Universidad di Aruba (UA) a keda anuncia un par di dia atras. Sharin Luydens, Hefe di Censo, lo ta e Presidente cu ta bay lidera e hunta directiva.
Ademas di e Hefe di Censo, kende ta conoci pa su posicion ‘forward-thinking’ pa loke ta trata medionan digital, mirando su contribucionnan na e manera di brinda servicio di Censo; e hunta nobo ta inclui varios director di departamento y hefe di seccionnan.
Bou nan ta haya Haime Croes, e director cu Minister Otmar Oduber (POR) a introduci den Directiva di Infrastructura DIP, Henry Koolman, Director di Oficina Central di Stadistica CBS y Angelo Brete, Director di e Unidad di Inteligencia Financiero MOT (Meldpunt Ongebruikelijke Transacties). Henter e hunta nobo lo eherce nan funcionnan nobo na Universidad di Aruba banda di nan trabou regular.
E hunta anterior a baha un par di luna atras, sea pa via di conflicto cu e Minister di Enseñansa, of pa via cu nan termino a caba y nan no a opta pa keda renoba nan status como miembro di hunta.
