Den cuadro cu diferente situacion fastioso pasando e ultimo temponan na Colegio Arubano , entre otro e situacion cu sr. Capelo y cambio di rector, Bon Dia a sinta cu 3 hoben cu ta representa e Hunta di Alumno di Colegio Arubano pa asina bay den e banda di e alumnonan pa mira si nan tambe ta enfrentando situacionnan fastioso na scol. Bon Dia a papia cu Ittalee Brown,17, di VWO 5, Faridi Dorff, 16, di VWO5 y Brandon Wong, 15 di VWO 3.
Manera studiante, boso ta sinti un malcontento na Colegio y si ta asina, pakico?
Ittalee:
”Como studiante, mi ta sinti cu tin un tipo di malcontento na Colegio pero e ta mas tanto over di locual a pasa cu Capelo y e situacion di e rector y tur esaki ta mas tanto entre e docentenan y directiva. Nos mes no ta hopi afecta di esaki pero sinembargo ta haya cu e ta un lastima”
Faridi:
”Pa e alumnonan porta no realmente pasobra nos no a realmente ripara di biaha cu no tin rector y tur locual ta pasando de biaha manera cu el a pasa, pues fuera di e situacion di Capelo nos a wordo informa poco despues di e cambio di Rector pero no den tur su detayenan. Pues pa nos , cos ta sigui normal”
Brandon:
”Di kico mi experencia ta, anto porta e ta varia entre hende, pero kico ami ta sinti ta cu e ta un problema mas pa e docentenan cu e ta pa nos manera alumno. Nos ta mas concentra riba studia y biniendo scol tur dia manera normal y nos no ta ripara cu tin algo andando te ora cu algo pasa y por ehempel bo mira cu tin menos actividad y cu nan ta haci cu locual nan por haya ora ta trata na actividad. ”
Con boso ta haya cu e comunicacion entre boso y e docentenan ta?
Faridi:
”Nos Mentor tin un bon comunicacion cu nos,e la sinta cu nos y splica nos tocante Capelo pero e no a conta nos hopi di e situacion cu directorado, esey nos a haya sa riba nos mes.”
Boso ta haya cu e tipo di problemanan aki entre docente y directiva ta strobando e manera di duna les?
Ittalee:
”Wel no directamente paso tin docente cu no ta realmente envolvi cu e cosnan ey, pero si tin docente cu ta envolvi den esaki y pa tal motibo bo por mira cu nan ta wordo afecta un poco manera persona pero te ainda mi por bisa cu e calidad di duna les no a wordo afecta ami ta haya.”
Faridi:
”Ami no ta haya tampoco pasobra hopi di e docentenan ta contento cu e rector a bay pasobra e tabata mucho streng y nan tabata haya cu e tabata wordo paga mucho hopi. Temporada di examen semper ta keda mesun stress pasobra asina cos ta, mester prepara pa examen cu tur e cos nan ey y ya fuera di esey no tin nada cu realmente ta strobando nos di studia na scol mes.”
Bon Dia a puntra e hobennan kico nan experiencia tabata ta cu sr.Timmermans manera rector caminda Faridi a contesta cu e tabata bon pa motibo cu e tabata presta atencion na e Hunta di Alumno y e puntonan cu nan tabata trece pa dilanti. Sinembargo, sr. Timmermans tabata biaha bay hopi Hulanda y esey e alumnonan a ripara tambe.
Brandon:
”Mi no por bisa cu e tabata un mal experiencia pasobra casi nos no tabata mira su persona ta cana rond den scol fuera di actividadnan cu tabata tuma luga. Tocante cambionan, nan a bisa nos cu e reglamento nobo lo ta cu lo mester papia Hulandes durante e lesnan y no durante pauze”
Kico boso ta haya lo por ta iniciativanan nobo of ideanan cu lo por trece un mehoracion na Colegio Arubano si esaki ta necesario?
Brandon:
”Mi no por duna bo un opinion detaya riba esaki pasobra ami apenas tin 2 aña studiando na Colegio, mi a caba na MAVO y bini studia aki. Pero mi ta haya manera Faridi ta bisa y manera nan a cuminsa haci caba den e ultimo temponan aki cu e alumnonan mester keda na prome luga y nos mester semper tin un stem cu si algo mester wordo cambia, pa nos tambe wordo envolvi den e proceso y tuma nos opinion den consideracion”
