E hunta di Aruba Hotel & Tourism Association (AHATA) a reuni cu directiva di Water- en Energiebedrijf Aruba N.V. (WEB) pa un discusion habri y transparente tocante e topico importante di demanda creciente di electricidad riba nos isla y capacidad di nos planta estatal.
Durante e encuentro, WEB a duna un splicacion detaya di e capacidad actual pa produccion di electricidad, e proyeccion di e demanda di coriente den futuro, y nan ideanan y plan strategico pa por cubri cu e demanda aki den e añanan binidero. E dialogo entre AHATA y WEB tabata positivo y constructivo, cu gran enfoke riba posibel solucionnan y riba colaboracion durante momentonan critico. AHATA a expresa speransa cu pronto Aruba lo sigui desaroya energia sostenibel, manera molina di biento.
Bayendo dilanti, AHATA lo keda activamente den dialogo cu WEB y otro partidonan involucra cu servicionan esencial na Aruba, pa asina sigui contribui na solucion efectivo y sostenibel cu ta cubri e necesidad di nos comunidad.
