(AP) — Un division entre Union Europeo y miembro obstina Hungria a profundisa ayera, na momento cu Budapest a veto un pakete di ayudo financiero di 18 biyon euro pa Kyiv, lagando e otro 26 pais den dificultad pa mantene e suministro di placa.
E posicion desafiante di Hungria tambe a agrava un disputa di UE tocante estado di derecho bao prome minister Viktor Orban y su opinion riba e invasion Ruso na Ucrania.
E nacion di 9.7 miyon a lora uesa e reglanan institucional complica di UE pa frustra e bloc y su 450 miyon hende den un reto geopolitico enorme, y yuda un aliado den necesidad precario.
Vice-presidente di Comision UE, Valdis Dombrovskis a bisa cu e guera na Ucrania ta exigi union y velocidad. Minister di Finanzas Hulandes, Sigrid Kaag a agrega: “E lo socava e credibilidad di Union Europeo si nos no por entrega. Pues e ta esencial.”
Hopi di e 26 estado miembro ta kere cu Orban ta nengando di participa pasobra UE ta menasando cu castiga Hungria door di retene biyones di euro pa faya di implementa reformanan solido pa estado di derecho. E decision aki ta enfrenta un fecha limite dia 19 di december, y e percepcion ta cu Hungria ta purbando di usa chantahe contra e otro miembronan.
Riba potret: Prome minister Hungaro, Viktor Orban.
