Trahado di rescate a bay band’i e riu Danube despues cu un boto cu tabata hiba turista di Sur Korea a sink algun seconde despues cu el a confronta un crucero.
A confirma 7 persona morto y 7 a wordo rescata. Ministro di Recurso Humano di Hungria, Miklos Kasler a bisa cu 4 di esunnan cu a wordo rescata a sali for di hospital, otro 3 ta ricibiendo tratamento. Polis a cuminsa un investigacion criminal pa e accident.
E agencia di tour ta conoci y ta organisa trip. 19 turista Koreano y dos miembro di crew di Hungria, e capitan y su assistent ta perdi. Den e boto tabata tin 30 turista, 2 guia y un fotografo den un pakete di tour di Europa.
Trahado di embahada di Sur Korea na Budapest ta asistiendo autoridadnan pa identifica esunnan cu a wordo rescata y esunnan cu a muri. E agencia ‘Very Good Tour’ a sali for di Sur Korea riba dia 25 di mei y lo mester a bay bek dia 1 di juni.
Mayoria tabata grupo di famia, incluyendo un mucha di 6 aña. Su estado no ta conoci pero e no a aparece den e lista di sobreviviente cu e agencia a entrega. Autoridad Lee Sang-moo a identifica e shete sobreviviente. Nan ta 6 muhe y un homber den edad di 31 pa 66 aña. E compania ta purbando pa trece e miembro di famia di e turista pa biaha pa Hungria mas pronto posibel.
Di acuerdo cu ley Hungaro, polis a aresta e capitan di e crucero pa cargo di pone transporte riba awa den peliger.
