E organisacion internacional Human Rights Watch a denuncia un ‘embestida’ contra e independencia di e Poder Hudicial di Bolivia, di parti di gobierno di Evo Morales, y a yama Organisacion di Estadonan Mericano pa haci un intervencion.
E destitucion‘arbitrario’ di casi un centenar di hues desde 2017 ‘seriamente ta debilita e independencia hudicial’, y ‘OEA mester convoca un reunion na su Conseho Permanente pa discuti e reforma hudicial cu ta debilita e Estado di Derecho’ na Bolivia, HRW a bisa den su informe tocante e pais, cu a ser conoci dialuna pasa na New York.
E organisacion a basa su observacionnan na e destitucion di huesnan, sin causa aparente y sin cu nan por haya un oportunidad di ‘impugna prome di ta destitui’. E ultimo destitucion a tene luga na luna di maart.
E cambio a ser ordena pa e Conseho di Magistratura, cu ta integra pa tres magistrado, dos di e cual tabata ex- funcionario di e gobierno di Morales, incluyendo su presidente, y nan ta parti di un ‘reforma hudicial’ cu ta wordo hiba pa un comision di nuebe miembro, cinco di cual ta ‘partidario di Morales of funcionario gubernamental cu el a designa’, e informa a bisa.
“Si e Bolivianonan no tin garantia di independencia hudicial, tur nan derechonan lo por ta menasa”, José Miguel Vivanco, director pa America di e organisacion defensor di derechonan humano, a sostene.
Mayoria di e candidatonan pa e cargo aki ‘tabata traha pa e gobierno di Morales’. Mientras cu tin luga den e destitucion caprichoso aki, e presidente Morales ta dedica na menosprecia e importancia di e independencia hudicial’, a agrega.
Bolivia ta forma parti di tratado y convencion riba derechonan humano cu ta exigi proteccion y respet di independencia hudicial.
