(Agencia Brasil) – Debi na intensificacion di temporada di candela na Amazonia y na Pantanal, un consecuencia di cambio climatico, ciudadnan di dies estado Brasilero a registra episodionan di huma y un reduccion di calidad di aire.

Potretnan haya pa Centro di Prevision Meteorologico y Studio Climatico ta mustra e concentracion di carbon monoxide den un area cu ta extende for di nort di Brazil pasando pa Peru, Bolivia y Paraguay. Siman pasa, Fondo di Nacionnan Uni pa Infancia (UNICEF) a bati alarma riba precaucion sanitario necesario den e caso aki.

Basa den datonan di Instituto Nacional di Investigacionnan Spacial (INPE), Ministerio di Medio Ambiente y Cambio Climatico a emiti un comunicado afirmando cu, e bioma Amazonico, estadonan di Amazonas y Para hunto ta suma mas di e mita (51.6%) di candela registra for di 1 januari y 18 augustus 2024. For di 1 di juli, 67.2% di candela registra a tuma luga den dos teritorio aki.

Segun Laboratorio di Aplicacion di Satelite Ambiental di Universidad Federal di Rio de Janeiro (Lasa-UFRJ), e aña aki e candela a consumi 3.2 miyon di hectar di Amazonia, loke ta representa 0.77% di bioma. Na Pantanal, casi 1.9 miyon hectar a ser consumi pa e candela, afectando 12.5% di e superficie di bioma.

Un alerta di peliger extremo di candela di Sistema di Alarma Lasa-UFRJ a ser emiti cu prevision pa e Cuenca di Paraguay, na Pantanal. Pa awe, 22 di augustus, segun e rapport, tur e region ta bay enfrenta condicionnan meteorologico cu ta dificulta e lucha contra e candelanan, incluyendo medionan aereo, debi na e velocidad halto cu e candela ta expande.

Un sala di situacion crea pa gobierno ta concentra for di juni ultimo e respuesta federal pa e candelanan na e pais. Nan a aloca 405 miyon real di Fondo Amazonia pa apoya cuerpo di bomberonan na Amazonia Legal. Na Pantanal, a dispone di un credito extraordinario di 137.6 miyon real, ademas e transferencia di otro 13.4 miyon real pa Ministerio di Integracion y Desaroyo Regional pa asistencia humanitario y lucha contra candelanan forestal.

Mientras tanto, na capital di estado di Rondonia, cerca frontera cu Bolivia, Porto Velho di 460,000 habitante, diamars ultimo a registra e pio calidad di aire di tur e ciudadnan grandi Brasilero, segun organismonan di monitoreo independiente IQAir.

Candela forestal a bira e shelo di Porto Velho di color shinishi scur y e ciudad ta mustra cu hopi neblina.

Te ayera tabata resulta dificil di por mira for di leu edificionan cu den condicionnan normal ta visibel perfectamente, segun un fuente a sigura.