Hulpbestuurskantoor San Nicolas lo habri back dia 26 di januari

Ayera mainta, parlamentario di partido POR, Alan Howell a ofrece un conferencia di prensa pa informa comunidad tocante e peticion cu el a haci na gobierno, pa asina por duna habitantenan di San Nicolas e oportunidad pa paga nan impuesto den nan mesun localidad.

El a clarifica cu e seccion pa loke ta trata pago di servicionan como awa, coriente of documentonan di Censo, cu ta ubica den parti pabao di Hulp bestuurskantoor, semper a keda funciona normal. Loke el a remarca ta cu e parti di seccion di impuesto no a continua.

Howell a señala cu el a duna gobierno dos luna di tempo pa por habri e facilidad aki back, algo cu loke el a sigura cu minister di Finanzas a cumpli, pa asina por ofrece un solucion pa hendenan di San Nicolas riba dia 26 di januari.

“Esaki ta un bon noticia, e seccion aki lo bay habri back”, Howell a comenta.

Tambe el a menciona cu esaki ta un solucion pa habitantenan di pariba di brug cu no tin necesidad pa bay te Savaneta pa mester paga nan impuesto. Esaki ta importante pa motibo cu segun Howell a splica, hende no ta para keto riba con importante ta e facilidad aki ta pa habitantenan di San Nicolas.

El a expresa cu tin hendenan grandi, asina como otro cu ta biba den Village, cu ta haci nan esfuerso pa por yega te Savaneta den bus of di otro manera pa por paga nan impuesto.

Igualmente, el a bisa cu nan a compronde tambe cu gobierno ta bay cuminsa renoba e hulp bestuurskantoor den su totalidad y esey “ta hopi importante, pasobra nos tur sa cu San Nicolas no a logra haya su MFA”, Howell a sigura.

Nan sa tambe cu a wordo bisa varios biaha caba cu lo no tin e placa disponibel pa traha un facilidad di un MFA completamente nobo pa San Nicolas. Pero e ta kere cu “hendenan di San Nicolas tambe ta merece di haya un facilidad bunita y moderno” pa asina nan tambe por paga servicionan di un manera mas facil y trankilo.

E ta pidi pa gobierno curasha pa move mas lihe posibel, pa di e manera ey no solamente e parti di impuesto mester sali afo, sino di empleadonan tambe, cu nan a compronde cu esunnan cu ta den e parti di abao di bestuurskantoor tampoco no ta di e miho manera, y nan kier traha den un ambiente mas sano y mas limpi.

El a expresa cu den gobernacion anterior a cuminsa traha riba un MFA pa San Nicolas, pero ora e gobierno aki a sinta, nan a laga sa cu nan no tin suficiente fondo cu mester a keda atras pa por traha e facilidad aki. P’esey segun Howell e gobierno aki a haci nan maximo esfuerso pa por sikiera renoba e facilidad aki, “pa asina San Nicolas por haya algo nechi”, Howell a declara.

Ora e servicio aki a habri dia 26 di januari, nan lo no bay scucha ningun reclamo pa loke ta trata servicio, segun loke Howell a señala, pa via cu nan ta confia cu e oficina di impuesto aki lo sa di duna un bon servicio pa habitantenan di San Nicolas keda satisfecho.

Tocante diferente proyectonan cu a wordo anuncia y tambe otronan cu durante gobernacion anterior no a bira realidad, Howell a anuncia cu diabierna ultimo el a entrega un peticion na presidente di parlamento, Juan Ady Thijsen, pa un reunion publico pa loke ta trata e desaroyo general. “E reunion ta bay concerni tur minister”, pa asina cada un di nan duna cuenta di loke nan tin den nan plan y ki dia exactamente cada proyecto ta bay cuminsa.

“Mi ta bay pone enfasis riba dje pa pueblo por scucha nan mes di cada minister kico di proyecto nan tin prepara pariba di brug, specialmente San Nicolas”, Howell a comenta.

Igualmente, a afirma cu gobernacion ta un continuacion, un tin proyectonan cu a cuminsa y no a termina, y tin di haci con largo e proyecto ta. “E importante pa Alan Howell y pa ciudadano pariba di brug ta cu nos kier mira e proyectonan cuminsa move.”

Ora e proyectonan aki ta cuminsa y tin movecion nan tin nan tempo pa termina. Por ehemplo, henter comunidad a yega di tende di un proyecto cu minister di Comunicacion, Transporte y Sector Primario, Chris Romero a trece dilanti, cu ta trata di Fast Ferry, asina como e hotel cu mester a bin pa San Nicolas y cu pa via di Covid-19 a para.

Tambe tin otro proyectonan di infrastructura den bario, na unda algun di nan mester wordo asfalta ainda. Howell a menciona cu un cantidad a haci peticion pa su persona pa e por haci su maximo esfuerso pa asina e barionan por haya nan asfalt y prome cu e gobernacion aki termina.

Tin diferente prioridad, segun Howell a splica. Un di nan ta trata di trabaonan na unda habitantenan di pariba di brug, cu tambe a wordo afecta di e crisis di Covid-19, ta faltando hopi trabao y esey ta un di e preguntanan cu ta bay tin pa e minister encarga di Labor, Glenbert Croes.

Ademas di esey, el a menciona cu tin personanan den situacion critico social, situacion economico caminda negoshinan tambe kier haya un sosten pa wak con por pick up e parti economico aki na San Nicolas, “diferente preocupacionnan cu ainda cu ta falta den resto di e lunanan aki pa termino di gobernacion aki, nos kier mira e diferencia tuma luga.”

Di loke ta trata e fecha cu e reunion publico aki lo tuma luga, Howell a bisa cu te ainda no tin un fecha precies y cu prome tin cu papia cu presidente di parlamento pa esaki por ta lo mas pronto posibel. “Mi no tin un duda cu e presidente di parlamento ta bay haci e reunion aki cu ta sumamente importante pa asina tur minister splica kico nan tin planea pa San Nicolas”, el a finalisa.