Hulanda y Aruba den wega contradictorio…Trato diferente pa Aruba y Curaçao riba tema ambiental

Pa algun tempo caba e editorial aki ta señala e politica diferente cu Hulanda tin pa Curaçao y Aruba. Na 2014 Prome Minister Mike Eman a percura pa e insultonan mas grave cu nos a yega di conoce na tur cos sagrado den trato di Reino, Rey y su representante. Pero mester bisa cu premier Eman a sa di salba e asunto y a mehora e relacion cu gobierno Hulandes atrobe. Tanto asina cu el a bira un pieza clave de relacion internacional pa Hulanda.

Recientemente, durante bishita di top ambtenaar van Zwol, a bin conoce cierto detaye, for di cual por destila cu gobierno di Hulanda ta mira futuro financiero di gobierno di Aruba cu mas optimismo, aunke lo mester sucede hopi ainda pa cos drecha a largo plaso. En todo caso gobierno Hulandes tambe ta spera hopi di e reapertura di e refineria y no ta parce di ta pone enfasis riba e problemanan ambiental cu reapertura lo significa, si no drecha nada na e forma con e refineria ta opera. Cu un PDVSA y Citgo sin recurso pa inverti den mehora e refineria, e probabilidad ta grandi cu e refineria ta cuminsa opera manera e tabata haci anteriormente. Pero ta parce cu esey no ta preocupa Hulanda. Por lo pronto nan ta mira solamente e beneficionan  financiero a corto plaso pa gobierno di Aruba y nada mas.

Esaki ta crea un contraste fuerte cu e maneho cu ta hibando cu nos hermana isla Curaçao, unda tin un preocupacion grandi pa e funcionamento di e refineria. Ta berdad cu e problema ambiental na Curaçao ta mas serio cu na Aruba, ya cu ora tin biento normal mes, un bon parti  di e isla ta afecta horiblemente pa  gas di e planta. Y esey no ta pa gaba e situacion na Aruba, cu tambe tabata conoce semper varios dia pa aña cu bien por cera scol pasobra huma no ta permiti duna les.

Manera a keda publica recientemente, parlamento Hulandes a cuminsa pone presion pa Curaçao cumpli cu normanan internacional di medio ambiente. Straño ta cu den e caso di e refineria di Aruba diripiente no ta existi tanto gana pa discuti e aspecto aki; ta parce mas importante pa djis habri e refineria, punto.  Pero, di unda a sali e contradiccion straño aki den  trato di e islanan? E tin di haci cu dos asunto clave. Uno ta cu premier Eman y su filosofia di sostenibilidad ta un vehiculo pa yuda Hulanda conkista un asiento den Conseho di Siguridad di Nacionnan Uni na juni proximo. Riba esey den e editorial aki nos a comenta ampliamente caba.  E otro aspecto ta e interesnan grandi den sector di petroleo y gas di companianan manera Shell, cu por conta cu apoyo completo di gobierno Hulandes pa logra nan entrada den e paisnan di mayor recurso natural, pa asina garantisa e companianan aki nan futuro.

Den e sector aki Venezuela ta naturalmente un di e grandinan. E pais aki ta conta cu e reservanan di petroleo proba mas grandi na mundo actualmente.  Tambe reserva di gas ta brinda hopi perspectiva pa explotacion. Asina ta cu pa e proximo mita siglo, ‘the place to be’ yama Venezuela. Banda di esey, Shell lo ta den e bon skina di ring caba si eventualmente cuminsa un competencia pa gas den awanan teritorial o e zona economico exclusivo di Aruba.

Den tur esaki, e hecho cu na e momento aki (ainda) tin un regimen na Venezuela cu ta duna problema ta fastioso, pero e politica pragmatico di e Hulandesnan ta cu nan ta dispuesto pa traha ‘con el dios y el diablo’. Si bin un cambio di gobierno den e pais ey, esey no ta afecta e relacionnan comercial. Ora comprende e tipo di politica aki, por comprende tambe cu den e dianan di e problema diplomatico alrededor  di ‘El Pollo’ Carvajal, tabata mas importante pa conserva e relacionnan bon cu Venezuela, cu atende un pedido di e aliado di semper, Merca, cu tabata solicita su extradicion.

Hulanda ta yudando di su banda tambe pa yega na un acuerdo cu Citgo/PDVSA, a pesar di tur duda cu por existi en cuanto nan credibilidad financiero, maneho ambiental, aportacion limita na economia di Aruba, etc. Tur cos na e momento aki ta parce di ta suheto na e meta Hulandes di mehora relacion politico y economico cu Venezuela. Presencia Venezolano na Aruba den sector petrolero por ta un pieza clave den henter e wega aki. Mientras cu na Curaçao Hulanda ta ‘play tough’ encuanto medio ambiente, na Aruba nan no kier papia di esaki y ta sostene gobierno di Aruba den crea un pantaya internacional di ‘sostenibilidad’, mientras na Aruba mes nos no por mira nada concreto di esaki. Pa partido opositor MEP e situacion straño ta awor cu nan aliado ideologico na Hulanda (PvdA) ta parce di ta haciendo tur lo posibel pa gabinete Eman bay eleccion na 2017 den un situacion faborabel. Ironia di bida…