(CuraçaoChronicle) – E compania tras ASN Bank, RegioBank y SNS, no ta haciendo suficiente trabao pa combati labamento di placa y terorismo den finanzas. De Nederlandsche Bank (DNB) a reprocha Volksbank, cual ta pertenece na Gobierno desde aña 2013 pa esaki. E regulador tin e intencion di impone un boet, sinembargo te ainda no a yega na un suma pa esaki.
DNB a conta De Volksbank cu su “analisis di integridad sistematico” mester keda den ordo pa dia 1 di april di proximo aña. “DNB tambe a anuncia su intencion di inicia e procedura di impone un boet administrativo,” e banco nacional a anuncia cu su resultadonan pa mita di e aña.
Reglanan di labamento di placa tin varios aña ta causa problema pa banconan Hulandes. ING y ABN Amro ambos mester a paga miyones di euro despues di yega na areglonan cu Ministerio Publico (OM). Den aña 2018, Rabobank a ricibi un boet di 500,000 euro a causa di violacion di e reglanan. E cantidad aki mester a keda paga un biaha mas den aña 2021 pa motibo cu e banco no a mehora su procedura lo suficiente.
E tres banconan grandi, INg, ABN Amro y Rabobank, a anuncia nan resultadonan pa e ultimo lunanan den dianan recien. Loke a sali na cla ta e ganashi halto cu nan a haci a causa di e aumento den interes, pero tambe e aumento den gasto cu nan mester a haci pa asina por combati cosnan manera labamento di placa. Den De Volksbank su caso, un aumento di 20% den gastonan di operacion no tabata suficiente pa completamente cumpli cu e reglanan contra labamento di placa.
“Nos ta lamenta cu nos no por a cumpli completamente cu nos responsabilidad pa mantene e integridad di nos clientenan,” CEO Martijn Gribnau a expresa. “Nos ta haciendo tur lo posibel pa nos por rectifica nos fayonan dentro di e periodo cu DNB a stipula.”
